Душанбе, 07 май, – АИ «Корвон Иттилоот».  Рӯзҳои 26–27 май дар пойтахти Ҷумҳурии Тоҷикистон Намоишгоҳи байналмилалии «Устувории захираҳои об барои роҳҳалҳои иқлимӣ» баргузор мегардад. Чорабинӣ дар доираи Раванди оби Душанбе ва ҳамзамон бо Конфронси 4-уми байналмилалии сатҳи баланд дар Душанбе оид ба татбиқи Даҳсолаи байналмилалии амал «Об барои рушди устувор, 2018–2028» баргузор мешавад. Дар ин бора Котиботи конфронс хабар медиҳад.

Тавре аз манбаъ иттилоъ доданд, ҳадафи асосии намоишгоҳ муаррифии технологияҳои пешрафта, дастовардҳои илмӣ ва таҷрибаи беҳтарин дар соҳаи идоракунии захираҳои об ва самтҳои иҷтимоию иқтисодии марбут ба он мебошад. Аз ҷумла, сухан дар бораи соҳаҳое чун энергетика, кишоварзӣ, обтаъминкунӣ, беҳдошт ва гигиена (WASH), ҳифзи муҳити зист, инчунин мутобиқшавӣ ба тағйири иқлим меравад.

Дар Котибот таъкид карданд, ки таваҷҷуҳи вижа ба ҳаллу фаслҳои бар пояи далелҳои воқеӣ зоҳир хоҳад шуд. Ин гуна роҳҳалҳо ба такмили идоракунии об, ҳифзи саломатии аҳолӣ ва муҳити зист, коҳиши хатари офатҳои табиӣ, инчунин пешбурди принсипҳои иқтисоди даврӣ бо назардошти баробарии гендерӣ ва фарогирии иҷтимоӣ равона шудаанд.

Интизор меравад, ки намоишгоҳ ба як платформаи муассир барои табодули дониш, густариши муколамаи касбӣ ва рушди робитаҳои шарикӣ миёни намояндагони сохторҳои давлатӣ, созмонҳои байналмилалӣ ва минтақавӣ, бахши хусусӣ, ҷомеаи илмӣ ва ниҳодҳои ҷомеаи шаҳрвандӣ табдил ёбад.

Тавре таъкид мешавад, чорабинӣ ҳамчунин ба баланд бардоштани дидбонии лоиҳаҳо ва ташаббусҳои муҳиме равона шудааст, ки ба дастёбӣ ба Ҳадафҳои рушди устувор, пеш аз ҳама ҲРУ 6 — таъмини дастрасӣ ва истифодаи оқилонаи захираҳои об ва беҳдошт барои ҳама мусоидат мекунанд. Ҳамзамон, намоишгоҳ ба дастгирии равандҳои боло бурдани иқтидор, интиқоли технологияҳо ва ҷалби сармоягузорӣ ба соҳаи об нигаронда шудааст.

Дар маҷмӯъ, баргузории ин намоишгоҳ ба ташаккули платформаи муштараки байналмилалӣ барои пешбурди роҳҳалҳои инноватсионӣ, таҳкими ҳамкории байнисоҳавӣ ва сафарбарсозии захираҳо бо мақсади таъмини устувории иқлимӣ дар соҳаи захираҳои об дар сатҳи минтақавӣ ва ҷаҳонӣ мусоидат хоҳад кард.

Акс: Котиботи Конфронси 4-уми байналмилалии сатҳи баланд дар Душанбе.