Душанбе, 17 июл, – АИ «Корвон Иттилоот». Соҳаи сайёҳии Тоҷикистон рушди устувори худро идома медиҳад. Дар натиҷаи шаш моҳи аввали соли 2026 ҷумҳуриро зиёда аз 889 ҳазор сайёҳи хориҷӣ боздид намудаанд, ки ин аз таҳкими мавқеи кишвар дар бозори байналмилалии сайёҳӣ ва самаранокии сиёсати давлатӣ дар самти рушди ин соҳа шаҳодат медиҳад.

Тавре дар нишасти матбуотии Кумитаи рушди сайёҳии назди Ҳукумати Ҷумҳурии Тоҷикистон иттилоъ дода шуд, дар моҳҳои январ–июни соли ҷорӣ Тоҷикистонро зиёда аз 889 ҳазор сайёҳи хориҷӣ боздид карданд, ки нисбат ба ҳамин давраи соли 2025 16,7 фоиз зиёд мебошад.

Қисми асосии гардиши сайёҳӣ, чун анъана, ба кишварҳои Иттиҳоди Давлатҳои Мустақил рост омадааст. Аз шумораи умумии сайёҳон 806 ҳазору 900 нафар аз кишварҳои ИДМ ва 82 ҳазору 500 нафар аз давлатҳои хориҷи дур бо мақсади сайёҳӣ ба Тоҷикистон сафар намуданд.

Дар баробари ин, дар шаш моҳи аввали соли 2026 шумораи умумии шаҳрвандони хориҷие, ки ба Ҷумҳурии Тоҷикистон ворид шудаанд, ба 1 миллиону 163 ҳазору 400 нафар расидааст. Ин нишондиҳанда аз афзоиши ҳаракати байналмилалӣ, густариши робитаҳои иқтисодӣ ва болоравии ҷолибияти кишвар барои гурӯҳҳои гуногуни меҳмонони хориҷӣ шаҳодат медиҳад.

Тавсеаи инфрасохтори сайёҳӣ яке аз омилҳои асосии афзоиши шумораи меҳмонон боқӣ мемонад. Айни замон дар қаламрави ҷумҳурӣ 216 меҳмонхона, 53 хостел, 57 осоишгоҳ, 4 осоишгоҳи кӯдакона, 6 маркази табобатию солимгардонӣ, 8 истироҳатгоҳ ва 5 пойгоҳи сайёҳӣ фаъолият намуда, ба сайёҳони дохиливу хориҷӣ хизматрасониҳои гуногун пешниҳод мекунанд.

Ҳамзамон шабакаи ширкатҳои сайёҳӣ низ васеъ мегардад. Дар ҳоли ҳозир дар ҷумҳурӣ 191 ширкати сайёҳӣ хизмат мерасонанд. Аз ҷумла, 93 ширкат дар шаҳри Душанбе, 42 ширкат дар вилояти Суғд, 31 ширкат дар Вилояти Мухтори Кӯҳистони Бадахшон, 15 ширкат дар вилояти Хатлон ва 10 ширкат дар шаҳру ноҳияҳои тобеи ҷумҳурӣ фаъолият доранд.

Ба андешаи коршиносон, афзоиши устувори гардиши сайёҳӣ аз болоравии нуфузи байналмилалии Тоҷикистон ҳамчун самти ҷолиби сайёҳии экологӣ, кӯҳнавардӣ, фарҳангию таърихӣ ва солимгардонӣ шаҳодат медиҳад. Рушди пайвастаи инфрасохтор, беҳтар гардидани сифати хизматрасонӣ ва муаррифии фаъолонаи имкониятҳои сайёҳии кишвар дар сатҳи байналмилалӣ барои боз ҳам зиёд гардидани шумораи меҳмонони хориҷӣ заминаи мусоид фароҳам меорад.

Коршиносон таъкид мекунанд, ки рушди минбаъдаи соҳа ба гуногунсозии иқтисоди миллӣ, ҷалби сармоягузорӣ, таъсиси ҷойҳои нави корӣ ва афзоиши даромади минтақаҳо мусоидат намуда, сайёҳиро ҳамчун яке аз бахшҳои босуръат рушдёбандаи иқтисоди Тоҷикистон боз ҳам таҳким хоҳад бахшид.

АКС: Кумитаи рушди сайёҳии назди Ҳукумати Ҷумҳурии Тоҷикистон