Душанбе, 22 ноябр, – АИ Корвон Иттилоот. Ҳайати Ҷумҳурии Тоҷикистон дар Конфронси умумиҷаҳонии рушди телекоммуникатсия (WTDC-2025), ки аз 17 то 28 ноябр дар пойтахти Озарбойҷон — шаҳри Боку — баргузор мегардад, иштирок дорад. Ин конфронс яке аз муҳимтарин чорабиниҳои Иттиҳоди байналмилалии алоқа (МСЭ) буда, самтҳои асосии рушди соҳаи телекоммуникатсияро барои солҳои оянда муайян мекунад.
Дар WTDC-2025 нақшаи нави чорсолаи рушди соҳаи алоқаи МСЭ тасдиқ мегардад, ки дар он афзалиятҳои ҷаҳонӣ дар самти рақамикунонӣ, стандартҳои нав, таҳкими киберамният ва рушди инфрасохтори муосир баён мешаванд. Ҳадафи асосӣ — баланд бардоштани дастрасӣ ва самаранокии хизматрасониҳои алоқа ва истифодаи имкониятҳои технологияи нав дар кишварҳои узв мебошад.
Сардори Хадамоти алоқаи назди Ҳукумати Ҷумҳурии Тоҷикистон Исфандиёри Саъдулло дар ҷараёни суханронии худ дастовардҳои кишвар ва нақшаҳои стратегиро муаррифӣ намуд. Дар миёни самтҳои муҳим инҳо таъкид шуданд:
- навсозии инфрасохтори телекоммуникатсионӣ;
- ҷорӣ намудани технологияҳои муосир, аз ҷумла LTE-Advanced ва омодагӣ ба 5G;
- беҳтар намудани сифату дастрасии хизматрасониҳои алоқа дар шаҳрҳо ва деҳот;
- густариши хизматрасониҳои давлатии рақамӣ ва идомаи барномаҳои миллӣ оид ба рақамикунонӣ.
Исфандиёри Саъдулло зикр кард, ки рушди телекоммуникатсия яке аз омилҳои калидии рушди иҷтимоию иқтисодии Тоҷикистон мебошад ва ҳамкории байналмилалӣ барои ворид намудани таҷриба ва технологияҳои пешрафта аҳамияти хос дорад.
WTDC-2025 ба кишварҳо имконият медиҳад, то таҷрибаи худро мубодила карда, шарикони нав пайдо намоянд ва ба ташаббусҳои байналмилалӣ оид ба рақамикунонӣ ва алоқа ҳамроҳ шаванд. Дар конференсия масъалаҳои марбут ба ҳифзи киберамният, идоракунии рақамӣ, стандартҳои глобалии алоқа ва таҷдиди шабакаҳо муҳокима мегардад.
Ширкати Тоҷикистон дар ин чорабинӣ имкон медиҳад, ки дастовардҳои миллии соҳа ба ҷомеаи ҷаҳонӣ муаррифӣ шуда, ҳамзамон таҷрибаи беҳтарин кишварҳо барои такмили минбаъдаи инфрасохтори алоқа истифода гардад.
АКС: АМИТ «ХОВАР»