Душанбе, 13 май, – АИ «Корвон Иттилоот». Сафари давлатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Пекин дар яке аз маъруфтарин марказҳои илмии Чин — Донишгоҳи Пекин идома ёфт. Дар ин ҷо Сарвари давлат назди устодон ва донишҷӯён суханронӣ карда, ҳамзамон бо унвони баланди илмии профессори фахрӣ сарфароз гардонида шуд.
Дар маросими тантанавӣ ректори донишгоҳ Гун Сихуан қарори Шурои олимонро дар бораи тақдими ин унвон ба Президенти Тоҷикистон эълон намуд. Таъкид гардид, ки ин қадршиносӣ ба хотири саҳми арзанда дар таҳкими дӯстӣ ва ҳамкории Тоҷикистону Чин, рушди робитаҳои илмӣ, гуманитарӣ ва фарҳангӣ, инчунин ташаббусҳои ҷаҳонӣ дар соҳаи об ва иқлим сурат гирифтааст.
Зимни суханронӣ Эмомалӣ Раҳмон ба роҳбарияти донишгоҳ барои ин қадршиносӣ изҳори сипос намуда, нақши вижаи илму маорифро дар ҷаҳони муосир таъкид карданд. Сарвари давлат зикр намуд, ки муносибатҳои Тоҷикистону Чин имрӯз дар сатҳи шарикии ҳамаҷонибаи стратегӣ қарор дошта, сиёсат, иқтисод, амният, соҳаи гуманитарӣ ва илмро фаро мегиранд.
Пешвои миллат хотиррасон намуданд, ки решаҳои дӯстии Тоҷикистону Чин ба даврони Роҳи бузурги абрешим мерасанд. Ба гуфтаи ӯ, шаҳодатҳои таърихӣ ва бостоншиносӣ, аз ҷумла номаҳои қадимаи суғдӣ, аз робитаҳои деринаи фарҳангӣ ва тиҷоратии ду халқ гувоҳӣ медиҳанд.
Таваҷҷуҳи махсус ба рушди сармояи инсонӣ ва таҳсилоти байналмилалӣ зоҳир гардид. Эмомалӣ Раҳмон изҳор доштанд, ки ҳоло тақрибан 40 ҳазор шаҳрванди Тоҷикистон дар 47 кишвари ҷаҳон таҳсил мекунанд, аз ҷумла наздики 6 ҳазор нафар дар Чин. Дар солҳои соҳибистиқлолӣ беш аз 10 ҳазор донишҷӯи тоҷик муассисаҳои таҳсилоти олии Чинро хатм кардаанд. Дар худи Тоҷикистон Марказҳои Конфутсий фаъолият доранд ва дар ояндаи наздик, тибқи нақша, санади таъсиси боз як чунин марказ ба имзо хоҳад расид.
Президенти кишвар ҳамчунин таъкид намуданд, ки 10 муассисаи таҳсилоти олии Тоҷикистон узви шабакаи донишгоҳҳои СҲШ буда, дар 13 донишгоҳи кишвар омӯзиши забони чинӣ роҳандозӣ шудааст. Аз самтҳои умедбахши ҳамкорӣ таҳқиқоти муштарак дар соҳаҳои геология, тағйирёбии иқлим, ҳифзи пиряхҳо, захираҳои обӣ, таърих, бостоншиносӣ ва мероси фарҳангӣ ном бурда шуданд.
Таваҷҷуҳи хоса инчунин ба мубодилаи илмӣ ҷалб гардид. Эмомалӣ Раҳмон тарҷума ва нашри осори илмӣ ва фарҳангиро яке аз роҳҳои муҳими наздиксозии мардумон арзёбӣ намуда, ба нашри чинӣ шудани асари бузурги академик Бобоҷон Ғафуров «Тоҷикон: таърихи қадимтарин, қадим ва асри миёна» ҳамчун намунаи равшан ишора карданд.
Дар фароварди сухан Сарвари давлат таъкид намуданд, ки густариши ҳамкорӣ дар соҳаҳои илму маориф ва фарҳанг барои тарбияи насли нави мутахассисони рақобатпазир дар шароити ҷаҳони муосир пояҳои устувор фароҳам месозад.
АКС: Хадамоти матбуоти Президенти Ҷумҳурии Тоҷикистон