Душанбе, 06 август, – АИ «Корвон Иттилоот». Дар арафаи таҷлили 35-солагии Истиқлоли давлатии Ҷумҳурии Тоҷикистон дар ноҳияи Сино татбиқи барномаҳои омӯзиши касбӣ идома дошта, онҳо ба густариши шуғли аҳолӣ, дастгирии соҳибкории занон ва баланд бардоштани рақобатпазирии шаҳрвандон дар бозори меҳнат равона гардидаанд.

Муовини Раиси ноҳияи Сино Ситора Сафарализода ҳамроҳ бо намояндагони шуъбаи кор бо занон ва оила, инчунин мудири шуъбаи рушди иҷтимоӣ ва робита бо ҷомеа аз фаъолияти курсҳои касбомӯзии назди Агентии меҳнат ва шуғли аҳолӣ боздид намуд.

Ҳадафи боздид шиносоӣ бо раванди таълим, сифати омодасозии касбӣ ва шароити фароҳамшуда барои азхуд намудани ихтисосҳои серталаб буд.

Таъкид гардид, ки курсҳои ройгони касбомӯзӣ ба муносибати таҷлили 35-солагии Истиқлоли давлатии Ҷумҳурии Тоҷикистон роҳандозӣ шуда, пеш аз ҳама барои соҳибкасб намудани занону духтарони хонашин ва шаҳрвандони муваққатан бекор нигаронида шудаанд. Амалӣ гардидани чунин ташаббусҳо ба фароҳам овардани имкониятҳои нав барои касбомӯзӣ, баланд бардоштани сатҳи шуғли аҳолӣ ва рушди фаъолияти соҳибкорӣ мусоидат менамояд.

Зимни боздид масъулон бо раванди омӯзиши дӯзандагӣ ва пазандагӣ аз наздик шинос шуда, ба таъминоти моддию техникии синфхонаҳо, ташкили машғулиятҳои амалӣ ва сатҳи омодагии касбомӯзон баҳои воқеӣ доданд. Ҳамзамон, диққати махсус ба сифати раванди таълим ва мутобиқати малакаҳои азхудшаванда ба талаботи бозори муосири меҳнат равона гардид.

Қайд карда шуд, ки омӯзиши касбу ҳунар яке аз самтҳои муҳими сиёсати давлатии шуғли аҳолӣ ба шумор рафта, барои баланд бардоштани сатҳи худшуғлӣ, рушди соҳибкории хурду миёна, таҳкими мустақилияти иқтисодии шаҳрвандон ва беҳтар гардидани сатҳи зиндагии оилаҳо нақши муҳим мебозад.

Дар навбати худ, иштирокчиёни курсҳо аз шароити муҳайёшуда изҳори қаноатмандӣ намуда, иброз доштанд, ки дониш ва малакаҳои амалӣ ба онҳо имконият медиҳанд дар оянда соҳиби ҷойи кори доимӣ гардида ё фаъолияти соҳибкории шахсии худро роҳандозӣ намоянд ва манбаи устувори даромад барои оилаҳои худ фароҳам созанд.

Дар анҷоми боздид фаъолияти курсҳои таълимӣ мусбат арзёбӣ гардида, ба масъулон ва омӯзгорон ҷиҳати такмили минбаъдаи раванди таълим, истифодаи самараноки имкониятҳои мавҷуда ва боз ҳам баланд бардоштани сифати омодасозии касбӣ тавсияҳои мушаххас пешниҳод карда шуданд.

Рушди низоми омӯзиши ройгони касбӣ имрӯз ба яке аз самтҳои муҳими сиёсати иҷтимоии Ҷумҳурии Тоҷикистон табдил ёфтааст.

Чунин барномаҳо на танҳо ба коҳиши сатҳи бекорӣ ва тавсеаи имкониятҳои иқтисодии аҳолӣ мусоидат мекунанд, балки барои рушди соҳибкории занон, таҳкими сармояи инсонӣ ва баланд бардоштани сатҳи зиндагии оилаҳо низ заминаи устувор фароҳам меоранд.

Дар шароити тағйирёбии бозори меҳнат сармоягузорӣ ба рушди малакаҳои касбӣ аҳамияти стратегӣ пайдо намуда, фароҳам овардани дастрасии васеи занон ба таҳсилоти касбӣ ва азхудкунии ихтисосҳои муосир яке аз омилҳои муҳими рушди устувори иҷтимоию иқтисодии кишвар ба ҳисоб меравад.

Акс: Мақомоти иҷроияи ҳокимияти давлатии ноҳияи Сино.