Душанбе, 06 апрел, – АИ «Корвон Иттилоот». Дар шаҳри Қазон масъалаҳои ҳолати кунунӣ ва дурнамои ҳамкории дуҷониба миёни Тоҷикистон ва Русия дар соҳаи энергетика баррасӣ шуданд. Дар маркази мулоқоти вазири энергетика ва захираҳои оби Тоҷикистон ва вазири энергетикаи Федератсияи Русия масъалаҳои густариши ҳамкорӣ, ҷалби сармоягузорӣ ва ҷорӣ намудани технологияҳои муосир қарор доштанд.

Тавре Вазорати энергетика ва захираҳои оби Ҷумҳурии Тоҷикистон хабар медиҳад, ин мулоқот дар доираи Форуми байналмилалии электроэнергетикии Қазон — «ЭНЕРГОПРОМ» ва ҷаласаи 68-уми Шурои электроэнергетикии давлатҳои узви Иттиҳоди Давлатҳои Мустақил (ИДМ) баргузор гардид.

Мулоқоти Далер Ҷумъа ва Сергей Сивилёв идомаи муколамаест, ки дар шароити афзоиши ниёз ба энергетикаи устувор, навсозии инфрасохтор ва ҷалби сармоя аҳамияти бештар пайдо кардааст.

Ҷонибҳо ба масъалаҳои рушди ҳамкорӣ дар самтҳои истеҳсол ва интиқоли неруи барқ, ҷалби сармоягузорӣ ба лоиҳаҳои энергетикӣ ва татбиқи технологияҳои муосир таваҷҷуҳи махсус зоҳир намуданд. Аз ин лиҳоз, гуфтугӯ танҳо ба сатҳи дипломатӣ маҳдуд нашуда, ба самти таҳкими ҳамкории амалӣ ва дарозмуддат нигаронида шудааст.

Ҳамзамон таъкид гардид, ки ҷонибҳо омодаанд ҳамкории густурдаро дар доираи созишномаҳои мавҷуда идома дода, лоиҳаҳои муштараки энергетикиро татбиқ намоянд. Ин равиш имкон медиҳад, ки муносибатҳо аз сатҳи гуфтугӯ ба сатҳи натиҷаҳои мушаххас ва ҳамкории муассир гузаранд.

Барои Тоҷикистон, ки дорои иқтидори бузурги гидроэнергетикӣ мебошад, чунин мулоқотҳо аҳамияти стратегӣ доранд. Онҳо барои навсозии соҳа, баланд бардоштани самаранокии энергетикӣ ва таҳкими мавқеи кишвар дар фазои энергетикии минтақа имкониятҳои иловагӣ фароҳам меоранд.

Акс: Вазорати энергетика ва захираҳои оби Ҷумҳурии Тоҷикистон