Душанбе, 03 апрел, – АИ «Корвон Иттилоот». Масъалаи сифати ҳавои атмосферӣ дар Тоҷикистон пас аз баҳсҳои фаъол дар шабакаҳои иҷтимоӣ ва расонаҳои хориҷӣ ба маркази таваҷҷуҳи ҷомеа табдил ёфт. Дар посух ба ин ҳолат Агентии обуҳавошиносии назди Кумитаи ҳифзи муҳити зист бо иштироки коршиносон ва намояндагони ВАО ҳамоиши махсус баргузор намуд, то вазъиятро шарҳ дода, маълумоти дақиқ пешниҳод намояд.
Тавре дар Агентия зикр гардид, рӯзҳои охир дар фазои иттилоотӣ маълумоте паҳн шуд, ки ба хусусиятҳои миллӣ ва шароити ҷуғрофии кишвар пурра мутобиқ нест. Ба гуфтаи мутахассисон, ин ҳолат боиси нигаронии беасоси аҳолӣ гардид.
Дар ҷараёни ҳамоиш вазъи кунунии сифати ҳавои атмосферӣ мавриди таҳлил қарор гирифта, фаъолияти низоми мониторинг ба таври муфассал шарҳ дода шуд. Ин низом шабакаи озмоишгоҳҳои статсионарӣ ва сайёр, нуқтаҳои худкори назорат ва сохторҳои ҷамъоварӣ ва коркарди маълумоти экологиро дар бар мегирад.
Директори Агентии обуҳавошиносӣ Абдулло Қурбонзода таъкид намуд, ки Тоҷикистон сиёсати давлатии мутобиқшавӣ ба тағйирёбии иқлимро пайгирона амалӣ менамояд. Аз ҷумла, «Стратегияи миллии мутобиқшавӣ ба тағйирёбии иқлим то соли 2030» ва «Барномаи давлатии кабудизоркунӣ то соли 2040» ҳамчун санадҳои калидӣ барои таъмини тавозуни экологӣ, аз ҷумла беҳтар намудани сифати ҳаво, хизмат мекунанд.
Ҳамзамон коршиносон зикр намуданд, ки сатҳи ифлосшавии ҳаво на танҳо аз фаъолияти инсон, балки аз омилҳои табиӣ низ вобаста аст. Ҷойгиршавии ҷуғрофӣ, омадани чанг, тағйироти мавсимӣ ва равандҳои обуҳавошиносӣ ба нишондиҳандаҳои сифати ҳаво таъсири ҷиддӣ мерасонанд ва таҳлили ҳамаҷонибаро талаб мекунанд.
Таваҷҷуҳи махсус ба масъалаи дуруст шарҳ додани маълумот равона гардид. Ба гуфтаи мутахассисон, раддабандии байналмилалӣ на ҳамеша хусусиятҳои минтақаро ба назар мегирад, ки метавонад ба арзёбии нодуруст оварда расонад. Дар ин замина ба намояндагони ВАО рақамҳо ва усулҳои ченкунӣ мутобиқ ба талаботи муосир пешниҳод гардиданд.
Қисми муҳими чорабинӣ шиносоии рӯзноманигорон бо инфрасохтори мониторинг буд: онҳо Маркази пешгӯии обуҳаво, раёсати мониторинги муҳити зист, озмоишгоҳҳои назорати ифлосшавии ҳаво ва об, инчунин нуқтаҳои худкор ва сайёри назоратро аз наздик диданд.
Таҳлилгарон бар онанд, ки чунин форматҳои кушоди ҳамкорӣ бо ВАО нишонаи шаффофият ва талош барои баланд бардоштани маърифати экологӣ дар ҷомеа мебошад.
Дар анҷом таъкид гардид, ки беҳбуди вазъи муҳити зист танҳо тавассути ҳамоҳангсозии талошҳои давлат, коршиносон, ВАО ва ҷомеа имконпазир аст. Дар шароити тағйирёбии глобалии иқлим, ин масъала аҳамияти миллӣ ва байналмилалӣ касб мекунад.