Душанбе, 19 май, – АИ «Корвон Иттилоот». Дар шаҳри Душанбе, дар меҳмонхонаи «Румӣ», машварати кории ҷонибҳои манфиатдор баргузор гардид, ки ба ҳамгироии баробарии гендерӣ ва инклюзивияти иҷтимоӣ ба раванди таҳияи NDC 3.0 — саҳми сеюми муайяншудаи миллии Ҷумҳурии Тоҷикистон бахшида шуда буд.

Дар машварат намояндагони вазорату идораҳо, ҷомеаи шаҳрвандӣ, доираҳои илмӣ, бахши хусусӣ ва шарикони байналмилалии рушд иштирок карданд. Тибқи иттилои UNDP, ҳадафи мулоқот таъмин намудани иштироки фарогиртар ва муассиртар дар ташаккули сиёсати миллии иқлимии кишвар буд.

Мантиқи чунин рӯзнома равшан аст: дар Тоҷикистон хатарҳои иқлимӣ кайҳо боз на танҳо ба табиат, балки ба бофтаи иҷтимоии ҷомеа таъсир мерасонанд. Кишваре, ки UNDP онро аз ҷумлаи осебпазиртарин давлатҳо дар баробари паёмадҳои тағйирёбии иқлим мешуморад, бо мушкилоте чун обшавии пиряхҳо, селу ярч, хушксолӣ ва камбуди об рӯбарӯ мебошад.

Ин хатарҳо ба ҳамаи гурӯҳҳо яксон таъсир намерасонанд: занон, ҷавонон, шахсони маъюб ва дигар қишрҳои осебпазир бештар бо монеаҳо дар дастрасӣ ба захираҳо, хизматрасониҳо, қабули қарорҳо ва маблағгузории иқлимӣ рӯ ба рӯ мешаванд. Аз ҳамин ҷост, ки сиёсати фарогири иқлимӣ на иловагӣ, балки шарти самаранокӣ ва адолати он шуморида мешавад.

Ин муҳокима дар заминае сурат гирифт, ки худи рӯзномаи иқлимии Тоҷикистон аллакай унсурҳои муносибати гендериро дар бар мегирад. Дар NDC-и навшудаи кишвар, ки дар феҳристи UNFCCC ҷойгир аст, масъалаҳои иҷтимоӣ ва гендерӣ вобаста ба дастрасӣ ва идоракунии захираҳои обӣ, инчунин чораҳо барои рушди гендерфарогири кишоварзӣ ва ҳифзи гуногунии биологӣ ба таври возеҳ зикр шудаанд. Яъне, мулоқоти Душанбе аз сифр шурӯъ нашуд, балки идомаи мантиқи қаблан гузошташуда буда, онро ба сатҳи низоммандтар ва муосиртар мебарад.

Дар анҷоми машварат иштирокчиён як қатор пешниҳодҳоро муайян карданд, ки онҳо тавассути Гурӯҳи байниидоравии корӣ оид ба баробарии гендерӣ ҷамъбаст шуда, ба версияи ниҳоии NDC 3.0 ворид карда мешаванд. Чунин механизм на танҳо барои ҳамоҳангсозии сохторҳо муҳим аст, балки барои он низ аҳамият дорад, ки дар сиёсати иқлим на танҳо садои муассисаҳо, балки овози ҷомеа — пеш аз ҳама занон, ҷавонон ва гурӯҳҳои осебпазир — шунида шавад. Маҳз ҳамин аст моҳияти NDC-и насли нав: он бояд на танҳо як уҳдадории байналмилалӣ, балки абзори амалии рушди устувор ва одилона дар дохили кишвар гардад.

Акс: UNDP Tajikistan / Sadullo Ishankulov.