Душанбе, 25 июл, – АИ «Корвон Иттилоот». Дар шаҳри Душанбе 23 июл лоиҳаи Стратегияи идоракунии партовҳои сахти маишӣ дар Ҷумҳурии Тоҷикистон то соли 2040 ва лоиҳаи Маркази минтақавии идоракунии партовҳо барои пойтахт муаррифӣ гардид. Дар ин бора Кумитаи ҳифзи муҳити зисти назди Ҳукумати Ҷумҳурии Тоҷикистон хабар медиҳад.

Дар ҷаласаи корӣ намояндагони Бонки осиёии рушд (ADB), Бонки Аврупоии таҷдид ва рушд (БАТР), Бонки ҷаҳонӣ, Барномаи рушди СММ (БРСММ), JICA, вазорату идораҳои давлатӣ ва мақомоти иҷроияи ҳокимияти давлатии шаҳри Душанбе иштирок намуданд.

Тибқи маълумоти Кумита, соли 2025 дар Тоҷикистон тақрибан 1,6 миллион метри мукааб партов ҷамъоварӣ шудааст, ки ба ҳисоби миёна ба ҳар як сокини кишвар тақрибан 150 килограмм рост меояд. Ба таъкиди масъулон, ҳаҷми партовҳо ҳамасола афзоиш меёбад.

Раиси Кумитаи ҳифзи муҳити зист Баҳодур Шерализода ёдовар шуд, ки моҳи сентябри соли 2025 Президенти Ҷумҳурии Тоҷикистон муҳтарам Эмомалӣ Раҳмон супориш дода буданд, ки корхонаҳои коркарди партовҳо бо ҷалби сармоягузориҳои дохилӣ ва хориҷӣ рушд дода шаванд.

Ҳамзамон бо стратегия Нақшаи амал барои солҳои 2026–2030 низ таҳия гардидааст. Дар ин ҳуҷҷатҳо такмили қонунгузорӣ дар асоси принсипҳои иқтисоди даврӣ ва масъулияти васеи истеҳсолкунандагон, навсозии партовгоҳҳо ва рушди технологияҳои табдили партов ба энергия пешбинӣ шудааст.

Инчунин тақвияти низоми муносибати бехатар бо партовҳои хатарнок, тиббӣ, электронӣ ва сохтмонӣ, ҷорӣ намудани мониторинги рақамӣ ва баланд бардоштани шаффофияти соҳа аз ҷумлаи самтҳои асосии стратегия арзёбӣ мешаванд.

Иштирокдорони ҷаласа зикр намуданд, ки стратегия ба уҳдадориҳои байналмилалии Тоҷикистон дар доираи Конвенсияҳои Базел, Стокҳолм ва Роттердам, Созишномаи Париж оид ба иқлим ва Ҳадафҳои рушди устувор мутобиқ мебошад.

Дар поёни ҷаласа намояндагони сохторҳои давлатӣ ва созмонҳои байналмилалӣ масъалаҳои ҳамкории минбаъдаро барои татбиқи ин ташаббусҳо баррасӣ карданд.

Қаблан Asia-Plus навишта буд, ки бузургтарин партовгоҳи кишвар дар масофаи тақрибан 11 километр аз шаҳри Душанбе ҷойгир буда, тақрибан 40 сол боз истифода мешавад. Тирамоҳи соли 2024 дар ин партовгоҳ сӯхтори тӯлонӣ ба амал омада буд, ки баъди он мақомоти шаҳр бори дигар аз нақшаи бунёди корхонаи коркарди партовҳо дар ин минтақа хабар доданд.

Ҳанӯз соли 2020 мақомоти шаҳри Душанбе аз сохтмони чунин корхона бо дастгирии созмонҳои байналмилалии молиявӣ иттилоъ дода буданд. Он замон пешбинӣ мешуд, ки корхона то охири ҳамон сол ба истифода дода шавад, аммо лоиҳа дар муҳлати эълоншуда амалӣ нагардид.

Акс: Кумитаи ҳифзи муҳити зисти назди Ҳукумати Ҷумҳурии Тоҷикистон