Душанбе, 01 ноябр, – АИ «Корвон Иттилоот». Таҳти раёсати Президенти Ҷумҳурии Тоҷикистон, Пешвои миллат, Раиси Ҳукумати кишвар муҳтарам Эмомалӣ Раҳмон 31 октябр ҷаласаи навбатии Ҳукумати Ҷумҳурии Тоҷикистон баргузор гардид, ки дар он масъалаҳои асосии иҷтимоиву иқтисодии соли 2026 ва дурнамои миёнамӯҳлат баррасӣ шуданд.
Дар ҷаласа лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2026» ва дурнамои нишондиҳандаҳои буҷети давлатӣ барои солҳои 2027–2028 пешниҳод гардид.
Таъкид шуд, ки лоиҳаи мазкур дорои як қатор муқаррароти нав буда, самтҳои асосии сиёсати иқтисодии кишварро инъикос мекунад.
Даромади Буҷети давлатӣ барои соли 2026 ба маблағи 65 миллиард сомонӣ пешбинӣ гардидааст, ки 31,2 фоиз бештар аз буҷети тасдиқшудаи соли 2025 мебошад ва 33,3 фоизи ММД-ро ташкил медиҳад.
Барои маблағгузории соҳаҳои иҷтимоӣ, аз ҷумла маориф ва тандурустӣ, 29,5 миллиард сомонӣ ҷудо шудааст, ки 44 фоизи ҳаҷми умумии хароҷоти буҷет ва 15,1 фоизи ММД-ро дар бар мегирад. Ин нишондиҳанда далели таваҷҷуҳи устувори Ҳукумати мамлакат ба рушди сармояи инсонӣ мебошад.
Вазири молия Файзиддин Қаҳҳорзода дар бораи лоиҳаи Барномаи қарзгирии давлатии беруна барои соли 2026 ва дурнамои нишондиҳандаҳои он барои солҳои 2027–2028 гузориш дод.
Барнома 52 созишномаи қарзӣ, аз ҷумла 36 созишномаи амалкунанда ва 16 созишномаи дар марҳилаи мувофиқасозӣ қарор доштаро фаро мегирад. Ҳадафи асосӣ — назорати самаранок дар самти ҷалби қарзҳои хориҷӣ ва пешгирӣ аз афзоиши назоратнашавандаи қарзи берунӣ мебошад.
Президенти мамлакат дастур доданд, ки барои афзун намудани даромадҳои буҷет, аз ҷумла бо тезонидани раванди рақамикунонӣ, гузариш ба пардохтҳои ғайринақдӣ ва истифодаи технологияҳои муосир дар нуқтаҳои гумрукию сарҳадӣ, чораҳои муассир андешида шаванд.
Дар ҷаласа ҳамчунин лоиҳаи Барномаи давлатии рушди илмҳои риёзӣ, дақиқ ва табиӣ барои солҳои 2026–2030 мавриди баррасӣ қарор гирифт.
Вазири маориф ва илм Раҳим Саидзода иттилоъ дод, ки барнома бо ҳадафи таҳкими иқтидори илмӣ, баланд бардоштани самаранокии таҳқиқот, таҳия ва татбиқи технологияҳои инноватсионӣ ва муттаҳид сохтани неруҳои илмӣ ба самтҳои афзалиятноки рушди иҷтимоиву иқтисодии кишвар таҳия шудааст.
Ҳамчунин масъалаҳои зерин баррасӣ гардиданд:
- пешниҳоди Маҷлиси вакилони халқи ноҳияи Сангвор оид ба ба шаҳрак табдил додани деҳаи Тавилдара;
- масъалаи омодагӣ ва баргузории Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028»;
- таъсиси Муассисаи давлатии «Маркази татбиқи лоиҳаи сохтмони Неругоҳи барқи обии “Хуталон”».
Дар анҷоми ҷаласа Президенти мамлакат муҳтарам Эмомалӣ Раҳмон ба роҳбарони вазорату идораҳо ва мақомоти маҳаллӣ супоришҳои мушаххас барои иҷрои барномаҳои давлатӣ, татбиқи қонунҳои амалкунанда ва ҳалли масъалаҳои мавсимӣ доданд.
Дастурҳои дигар низ барои омодагӣ ба давраи тирамоҳу зимистони солҳои 2025–2026, ҷамъоварии босамари ҳосил, захираи кофии маводи ғизоӣ ва сӯзишворӣ, инчунин вусъати корҳои созандагиву ободонӣ ба истиқболи 35-солагии Истиқлоли давлатӣ дода шуданд.
АКС: Хадамоти матбуоти Президенти Ҷумҳурии Тоҷикистон