Душанбе, 12 май, – АИ «Корвон Иттилоот». Дар пасманзари афзоиши таҳдидҳои амнияти озуқаворӣ ва ноустувории иқлимӣ, Душанбе боз як бор яке аз самтҳои муҳими сиёсати хориҷӣ ва иқтисодии худро таъкид кард — таҳкими шарикии байналмилалӣ дар бахши кишоварзӣ ва истифодаи оқилонаи захираҳои табиӣ.

Дар ин бора муовини Сарвазири Ҷумҳурии Тоҷикистон Сулаймон Зиёзода зимни Муколамаи сармоягузорӣ дар ҳошияи Конфронси 35-уми минтақавии ФАО барои Аврупо ва Осиёи Марказӣ изҳори назар намуд.

Ба гуфтаи Сулаймон Зиёзода, рушди воқеӣ танҳо тавассути ҳамкорӣ, ҳамдигарфаҳмӣ ва иқдоми ҳамоҳанг имконпазир аст. Ӯ таъкид кард, ки амнияти озуқавории Осиёи Марказӣ ва Аврупо масъулияти муштарак ва роҳи муштарак ба сӯи ояндаи устувор мебошад.

Зимни суханронӣ муовини Сарвазир изҳор дошт, ки Тоҷикистон бо доштани иқтидори бузурги табиӣ таъмини амнияти озуқавориро ҳамеша яке аз вазифаҳои стратегии худ медонад. Ба гуфтаи ӯ, ин масъала на танҳо авлавияти миллӣ, балки рисолати маънавӣ дар назди наслҳои оянда низ мебошад.

Таваҷҷуҳи махсус ба он равона шуд, ки кишварҳои Осиёи Марказӣ имконияти ҷиддӣ доранд, то ба як пойгоҳи муҳими аграрии минтақа табдил ёбанд. Сухан дар бораи заминҳои ҳосилхез, захираҳои обӣ ва иқлими мусоид барои парвариши навъҳои гуногуни зироатҳои кишоварзӣ меравад — ба шарте ки онҳо оқилона ва самаранок истифода шаванд.

Сулаймон Зиёзода аз ниҳодҳои молиявии байналмилалӣ, бахши хусусӣ ва шарикони ФАО даъват кард, ки талошҳоро ба самтҳое равона созанд, ки ояндаи минтақаро муайян хоҳанд кард: устувории озуқаворӣ, навсозии кишоварзӣ ва рушди устувори деҳот.

Коршиносон бар он назаранд, ки чунин мавқеъгузорӣ аз талоши Тоҷикистон барои таҳкими низоми озуқавории худ ва ҳамзамон муаррифии Осиёи Марказӣ ҳамчун бозигари муҳими рӯзномаи ҷаҳонии рушди устувор шаҳодат медиҳад.

АКС: АМИТ «Ховар»