Душанбе, 24 июл, – АИ «Корвон Иттилоот». Дар Ҷумҳурии Тоҷикистон натиҷаҳои рӯзҳои дуюм ва сеюми фаъолияти Мактаби тобистонаи миллӣ, ки ба омӯзиши стандартҳои байналмилалӣ ва механизмҳои амалии ҳифзи ҳуқуқи инсон бахшида шудааст, ҷамъбаст гардиданд. Ташкилкунандаи ин барномаи васеи таълимӣ Ташкилоти ҷамъиятии «Бюро оид ба ҳуқуқи инсон ва риояи қонуният» мебошад.

Барномаи рӯзҳои дуюм ва сеюм бо хусусияти баланди амалӣ фарқ мекард. Иштирокчиён — ҷавонони фаъол, роҳбарони ҷавон, ҳомиёни ҳуқуқ ва намояндагони ҷомеаи шаҳрвандӣ — ба омӯзиши шартномаҳои байналмилалӣ, механизмҳои Созмони Милали Муттаҳид ва тартиби мониторинги риояи ҳуқуқи инсон машғул шуданд.

Дар баробари бахши назариявӣ, иштирокчиён тавассути кори гурӯҳӣ, таҳлили ҳолатҳои воқеӣ (кейсҳо), бозиҳои моделсозӣ ва мубоҳисаҳои интерактивӣ малакаҳои амалии ҳимояи манфиатҳои ҷамъиятӣ ва татбиқи донишҳои ҳуқуқиро такмил доданд.

Баргузории Мактаби тобистона бо дастгирии шарикони байналмилалӣ амалӣ гардида, дар доираи ду барномаи асосӣ роҳандозӣ мешавад:

• Лоиҳаи Иттиҳоди Аврупо: «Тақвияти имкониятҳои насли нав: роҳбарии ҷавонон, табдили рақамӣ ва ислоҳоти ҳуқуқӣ барои ҷомеаи шаҳрвандии фарогир ва устувор дар Тоҷикистон», ки дар ҳамкорӣ бо ТҶ «Илмхона» ва ТҶ «Спин Плюс» татбиқ мегардад;

• Лоиҳаи Дафтари ҳамкории Швейтсария (SDC): «Дастгирии ҷомеаи шаҳрвандӣ ва мусоидат ба иҷрои уҳдадориҳои байналмилалии Тоҷикистон дар соҳаи ҳуқуқи инсон — Марҳилаи II».

Рушди мунтазами маърифати ҳуқуқии ҷавонон яке аз омилҳои муҳими таҳкими ҷомеаи ҳуқуқбунёд ва рушди устувори Ҷумҳурии Тоҷикистон ба ҳисоб меравад. Ҳамгироии имкониятҳои созмонҳои ҳомии ҳуқуқ, платформаҳои таълимӣ ва гурӯҳҳои махсуси коршиносӣ ба ташаккули муҳити муассири омӯзишӣ ва рушди иқтидори ҷавонон мусоидат мекунад.

Чунин ташаббусҳо на танҳо сатҳи донишҳои ҳуқуқии ҷавононро боло мебардоранд, балки барои омода намудани мутахассисони соҳибихтисос, ки метавонанд дар иҷрои уҳдадориҳои байналмилалии Тоҷикистон дар самти ҳуқуқи инсон саҳми арзанда гузоранд, заминаи боэътимод фароҳам сохта, ба таҳкими муколамаи созанда миёни ҷомеаи шаҳрвандӣ ва мақомоти давлатӣ мусоидат менамоянд.

АКС: Ташкилоти ҷамъиятии «Бюро оид ба ҳуқуқи инсон ва риояи қонуният