Душанбе, 18 июл, – АИ «Корвон Иттилоот». Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо кадрҳое, ки ба вазифаҳои роҳбарикунанда дар як қатор вазорату идораҳои кишвар таъйин гардиданд, мулоқот анҷом дод. Марҳилаи навбатии таъйиноти кадрӣ соҳаҳои калидии рушди иҷтимоию иқтисодии мамлакат, аз ҷумла низоми бонкдорӣ, маориф, илм, нақлиёт, энергетика, мақомоти гумрук ва низоми таъминоти нафақаро фаро гирифт.

Дар раванди таъйинот таваҷҷуҳи махсус ба ҷалби мутахассисони ҷавон, соҳибтахассус, дорои дониши забонҳои хориҷӣ ва малакаи истифодаи технологияҳои муосири рақамӣ зоҳир гардид. Маҳз чунин мутахассисон ба ҳайси муовинони роҳбарони вазорату идораҳо таъйин шуда, масъули масъалаҳои рақамикунонии равандҳои истеҳсолӣ, ҷорӣ намудани технологияҳои муосири иттилоотӣ ва такмили низоми идоракунии давлатӣ гардиданд.

Тағйироти кадрӣ ҳамчунин муассисаҳои таҳсилоти миёнаи умумӣ ва муассисаҳои таҳсилоти олии касбии Вазорати маориф ва илми Ҷумҳурии Тоҷикистонро низ дар бар гирифт. Ба вазифаҳои роҳбарӣ дар ин муассисаҳо мутахассисони ҷавоне таъйин шуданд, ки бо дастовардҳои назаррас дар фаъолияти илмӣ ва омӯзгорӣ шинохта шудаанд.

Зимни мулоқот Президенти мамлакат вазъи кунунии низоми маорифро ҳамаҷониба таҳлил намуда, ба масъалаҳои баланд бардоштани сифати таълим ва омодасозии мутахассисони ҷавобгӯ ба талаботи замони муосир таваҷҷуҳи хос зоҳир кард. Пешвои миллат бо овардани мисолҳои мушаххас масъалаҳои мавҷудаи соҳаи маориф, аз ҷумла норасоии кадрҳои соҳибтахассуси омӯзгорӣ ва зарурати омода намудани мутахассисони ҷавобгӯ ба талаботи иқтисоди муосирро мавриди баррасӣ қарор дод.

Эмомалӣ Раҳмон ба вазорату идораҳои соҳавӣ ва роҳбарони навтаъйиншуда оид ба баланд бардоштани сифати таҳсил, такмили низоми тайёр намудани кадрҳои ҷавон ва бартараф намудани камбудиҳои мавҷуда дар таъминоти кадрии соҳаи маориф дастуру супоришҳои мушаххас дод.

Дар анҷоми мулоқот Пешвои миллат роҳбарони навтаъйиншударо ба хизмати содиқона ба давлату миллат, иҷрои софдилона ва виҷдононаи вазифаҳои хизматӣ ва татбиқи самараноки сиёсати давлатӣ дар самтҳои вобасташуда ҳидоят намуд.

Коршиносон бар ин назаранд, ки сиёсати кадрии солҳои охир бештар ба ҳамгироии донишҳои касбӣ, иқтидори илмӣ ва салоҳиятҳои рақамии роҳбарон такя мекунад. Дар шароити татбиқи барномаҳои саноатикунонии босуръат, рақамикунонӣ ва рушди зеҳни сунъӣ маҳз сифати идоракунии давлатӣ ба яке аз омилҳои асосии расидан ба ҳадафҳои Стратегияи миллии рушди Ҷумҳурии Тоҷикистон то соли 2030 табдил меёбад.

АКС: НИАТ «Ховар»