Душанбе, 19 июн, – АИ «Корвон Иттилоот». Мақомоти шаҳри Душанбе сиёсати рақамикунонии муҳити шаҳрӣ ва рушди хизматрасониҳои муосири сайёҳиро идома медиҳанд. Қадами навбатӣ дар ин самт муаррифии лоиҳаи инноватсионии «QR-гид» гардид, ки ба сокинон ва меҳмонони пойтахт имкон медиҳад тавассути смартфонҳо маълумоти муфассалро дар бораи мавзеъҳои таърихӣ, фарҳангӣ ва сайёҳӣ дастрас намоянд.

Лоиҳаи нави рақамӣ дар ҷаласаи навбатии Шӯрои ҳамоҳангсоз оид ба фаъолияти соҳаи сайёҳӣ назди Мақомоти иҷроияи ҳокимияти давлатии шаҳри Душанбе муаррифӣ гардид.

Ташаббус бо ибтикори мақомоти шаҳр амалӣ шуда, ба рушди инфрасохтори сайёҳӣ, дастрас намудани иттилооти боэътимод оид ба мероси фарҳангии пойтахт ва татбиқи ҳадафҳои барномаи давлатии «Солҳои рушди иқтисоди рақамӣ ва инноватсияҳо барои солҳои 2025–2030» равона шудааст.

Ба андешаи таҳиягарон, низоми «QR-гид» идомаи мантиқии сиёсати давлатӣ дар самти рушди сайёҳӣ ва рақамикунонии хизматрасониҳо мебошад. Ҳадафи асосии он на танҳо пешниҳоди маълумот ба сайёҳон, балки муаррифии таърих, фарҳанг ва арзишҳои миллии мардуми тоҷик ба меҳмонони дохиливу хориҷӣ мебошад.

Лоиҳа дар ҳамкорӣ бо ниҳодҳои ҷомеаи шаҳрвандӣ таҳия гардида, имрӯз 45 мавзеъи таърихӣ, фарҳангӣ ва сайёҳии шаҳри Душанберо фаро мегирад. Барои дастрас намудани маълумот кофист, ки корбар рамзи махсуси QR-ро, ки дар назди иншоот насб шудааст, тавассути смартфон скан намояд. Пас аз он маълумоти муфассал дар бораи мавзеъ дар экран намоиш дода мешавад.

Маълумот ба забонҳои тоҷикӣ, русӣ ва англисӣ ҳам дар шакли матнӣ ва ҳам аудиоӣ пешниҳод мегардад. Дар марҳилаи навбатии татбиқи лоиҳа илова намудани забонҳои чинӣ ва арабӣ дар назар дошта шудааст, ки имкониятҳои истифодаи онро барои сайёҳони хориҷӣ боз ҳам васеътар хоҳад кард.

Аз хусусиятҳои ҷолиби ташаббус истифодаи лавҳаҳои иттилоотии аз мармар омодашуда мебошад, ки дар назди муҳимтарин мавзеъҳои сайёҳии пойтахт насб шудаанд. Маълумот дар бораи ҳар як объект дар портали расмии сайёҳии шаҳр — Dushanbe Travel ҷойгир гардида, аз ҷониби мутахассисони соҳавӣ омода шудааст, ки саҳеҳӣ ва эътимоднокии онро таъмин менамояд.

Коршиносон таъкид мекунанд, ки истифодаи технологияҳои QR имрӯз ба яке аз тамоюлҳои асосии рушди сайёҳии ҷаҳонӣ табдил ёфтааст. Сайёҳони муосир бештар аз телефонҳои мобилӣ барои гирифтани маълумот, тарҳрезии хатсайрҳо ва шиносоӣ бо ҷойҳои диданӣ истифода мебаранд. Аз ин рӯ, хизматрасониҳои рақамӣ ба ҷузъи ҷудонашавандаи инфрасохтори рақобатпазири сайёҳӣ табдил ёфтаанд.

Ғайр аз роҳатии истифода, чунин низом имкон медиҳад маълумот мунтазам навсозӣ гардида, зарурати насби стендҳои калонҳаҷми иттилоотӣ коҳиш ёбад. Ин ба рушди муҳити муосир, сарфакорона ва аз ҷиҳати экологӣ мувофиқи шаҳр мусоидат мекунад.

Имрӯз «QR-гид» на танҳо як воситаи иттилоотӣ, балки ҷузъи муҳими экосистемаи рақамии сайёҳии Душанбе ба ҳисоб меравад. Татбиқи чунин лоиҳаҳо ба консепсияи байналмилалии «Шаҳри ҳушманд» (Smart City) мувофиқ буда, истифодаи технологияҳои рақамиро барои беҳтар намудани сифати зиндагӣ ва хизматрасонӣ таъмин мекунад.

Мутахассисон бар ин назаранд, ки ҷорӣ намудани чунин қарорҳои инноватсионӣ рақобатпазирии Душанбе дар бозори байналмилалии сайёҳиро баланд бардошта, ҷолибияти пойтахтро барои меҳмонони хориҷӣ афзоиш медиҳад ва ба муаррифии муассири мероси ғании таърихию фарҳангии Тоҷикистон мусоидат хоҳад кард.

АКС: Шуъбаи рушди сайёҳии Мақомоти иҷроияи ҳокимияти давлатии шаҳри Душанбе.