Душанбе, 24 сентябр, – АИ «Корвон Иттилоот». Ҳафтаи гузашта дар Душанбе баррасии сатҳи олии платформаи кишварӣ оид ба татбиқи Нақшаи амалии солҳои 2024–2026 дар доираи Стратегияи ҳифзи саломатии аҳолии Ҷумҳурии Тоҷикистон то соли 2030 баргузор шуд.
Дар ҷаласа, ки таҳти роҳбарии муштараки Вазорати молияи Ҷумҳурии Тоҷикистон ва Вазорати тандурустӣ ва ҳифзи иҷтимоии аҳолӣ баргузор гардид, намояндагони вазорату идораҳои асосии соҳавӣ ва шарикони рушд иштирок карданд.
Натиҷаҳои арзёбии пешрафти ду соли татбиқи нақша нишон медиҳанд, ки дар самтҳои калидии ислоҳоти соҳаи тандурустӣ пешравиҳои назаррас ба даст омадаанд. Аз ҷумла, масъалаҳои рушди хизматрасонии тиббии аввалия, таҳкими иқтидори неруи кории соҳа, таъмини маблағгузории устувори тандурустӣ ва такмили системаҳои иттилоотии идоракунии тандурустӣ дар маркази татбиқи нақша қарор доранд.
Тибқи натиҷаҳои баррасӣ, тақрибан сеяки чорабиниҳои пешбинишуда пурра ба анҷом расида, зиёда аз нисфи онҳо дар марҳилаи иҷрои фаъол қарор доранд ва қисми боқимонда ҳанӯз дар марҳилаи оғоз қарор дорад.
Ин нишондиҳандаҳо аз он шаҳодат медиҳанд, ки татбиқи нақша дар як қатор самтҳо ба марҳилаи амалии худ гузаштааст, ҳарчанд барои иҷрои пурраи тамоми ӯҳдадориҳои пешбинишуда то анҷоми соли 2026 ҳанӯз кор идома дорад.
Соли 2026 барои Нақшаи амалии ҷорӣ соли ниҳоӣ ба ҳисоб меравад. Аз ин рӯ, баррасии сатҳи олӣ на танҳо ба арзёбии натиҷаҳои ду соли гузашта, балки ба ташаккули марҳилаи навбатии банақшагирии соҳаи тандурустӣ низ равона шудааст.
Ҳукумати Тоҷикистон дар ҳамкорӣ бо шарикони рушд омодагиро ба давраи нави нақшарезӣ оғоз намуда, ҳадаф дорад татбиқи ҳадафҳои Стратегияи ҳифзи саломатии аҳолӣ то соли 2030 ба таври пайваста идома ёбад.
Дар ин раванд масъалаи ҳамоҳангсозии сиёсати давлатӣ, захираҳои молиявӣ ва дастгирии шарикони рушд аҳамияти хос пайдо мекунад. Зеро рушди хизматрасонии аввалияи тиббӣ, омода ва нигоҳ доштани кадрҳои соҳаи тандурустӣ, устувории молиявии система ва рақамикунонии идоракунӣ аз самтҳое мебошанд, ки натиҷаи онҳо ба дастрасӣ ва сифати хизматрасонии тиббӣ барои аҳолӣ таъсири мустақим мерасонад.
Гурӯҳи Бонки Ҷаҳонӣ ва Механизми глобалии маблағгузорӣ барои занон, кӯдакон ва наврасон (GFF) таъкид мекунанд, ки омодагии худро барои идомаи ҳамкорӣ бо Тоҷикистон дар самти ташаккули низоми тандурустии қавитар, дастрас ва устувор барои тамоми аҳолӣ нигоҳ медоранд.
Ҳамкории минбаъда бо шарикони рушд, аз ҷумла дар доираи нақшаи муштараки амал, ба ҳамоҳангсозии талошҳо ва захираҳо барои расидан ба ҳадафҳои Стратегияи тандурустии Тоҷикистон то соли 2030 равона хоҳад шуд.
Ҳамин тариқ, натиҷаҳои баррасии сатҳи олӣ нишон медиҳанд, ки татбиқи Нақшаи амалии солҳои 2024–2026 ҳамзамон бо ҷамъбасти марҳилаи ҷорӣ ба таҳияи замина барои давраи навбатии ислоҳоти тандурустӣ роҳ мекушояд.
Ҳадафи асосӣ нигоҳ доштани пайдарпайии ислоҳот ва табдил додани натиҷаҳои бадастомада ба заминаи устувор барои беҳтар намудани дастрасӣ ва сифати хизматрасониҳои тиббӣ дар солҳои минбаъда мебошад.
АКС: Гурӯҳи Бонки ҷаҳонӣ дар Тоҷикистон