Душанбе, 20 ноябр, – АИ Корвон Иттилоот. 18 ноябр дар Душанбе мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо Вазири федералии масъули масоили паноҳандагон, муҳоҷират, ҳамгироии иҷтимоӣ ва сиёсати шаҳрии Подшоҳии Белгия Аннелин ван Боссёйт баргузор шуд.

Дар мулоқот ҷонибҳо дурнамои тавсеаи ҳамкории Тоҷикистону Белгия дар соҳаи муҳоҷирати меҳнатиро баррасӣ намуданд.

Ба иттилои Вазорати корҳои хориҷӣ, дар ҷараёни мулоқот масъалаҳои зерин мавриди таваҷҷуҳ қарор гирифтанд:

• танзими равандҳои муҳоҷирати меҳнатӣ,
• пешгирии муҳоҷирати ғайриқонунӣ,
• таҳкими робитаҳои иқтисодиву тиҷоратӣ,
• эҷоди шароити беҳтари ҳамгироии иҷтимоии муҳоҷирон.

Гуфтугӯҳо ҳавасмандии ду кишварро ба муқаррар кардани механизмҳои муназзам, қонуниву амни муҳоҷирати меҳнатӣ тасдиқ намуданд. Барои Тоҷикистон ин самт аҳамияти стратегӣ дошта, ба ҳимояи ҳуқуқу манфиатҳои шаҳрвандони кишвар дар хориҷ мусоидат мекунад.

Дар поёни мулоқот Сироҷиддин Муҳриддин ва Аннелин ван Боссёйт Ёддошти тафоҳум имзо карданд, ки заминаи муҳими густариши ҳамкории амалӣ ба ҳисоб меравад.

Ин ҳуҷҷат имкони татбиқи барномаҳои муштарак, мубодилаи таҷриба ва ташкили механизмҳои муосири ҳифзи ҳуқуқи муҳоҷиронро фароҳам меорад.

Пешбинӣ мешавад, ки амалисозии Ёддошти тафоҳум ба таҳкими робитаҳои ду кишвар ва фароҳам овардани имкониятҳои иҷтимоиву иқтисодии нав мусоидат мекунад.

АКС: Вазорати корҳои хориҷии Ҷумҳурии Тоҷикистон