Душанбе, 12 май, – АИ «Корвон Иттилоот». Дар пасманзари афзоиши таҳдидҳои глобалӣ — аз тағйирёбии иқлим то ноустувории бозорҳои ҷаҳонии озуқаворӣ — Душанбе ба яке аз майдонҳои муҳими муколамаи байналмилалии аграрӣ табдил меёбад. Дар ин замина мулоқоти Сарвазири Ҷумҳурии Тоҷикистон Қоҳир Расулзода бо Директори генералии Созмони озуқаворӣ ва кишоварзии Созмони Милали Муттаҳид (ФАО) Цюй Дунъюй аҳамияти вижа касб намуд.

Музокирот 11 май дар ҳошияи Конфронси 35-уми минтақавии ФАО барои Аврупо ва Осиёи Марказӣ баргузор гардид, ки имрӯз дар Душанбе намояндагони даҳҳо давлат, созмонҳои байналмилалӣ ва доираҳои коршиносиро муттаҳид кардааст.

Зимни мулоқот ҷонибҳо вазъи кунунӣ ва дурнамои ҳамкории Тоҷикистон бо ФАО-ро баррасӣ намуда, таваҷҷуҳи махсусро ба масъалаҳои амнияти озуқаворӣ, рушди устувори кишоварзӣ ва мутобиқсозии бахши аграрӣ ба паёмадҳои тағйирёбии иқлим равона карданд.

Сарвазири Тоҷикистон Қоҳир Расулзода таъкид намуд, ки кишоварзӣ ҳамоно яке аз соҳаҳои стратегии иқтисоди миллӣ боқӣ монда, дар рушди саноат, шуғли аҳолӣ ва иқтидори содиротии кишвар нақши муҳим мебозад.

Дар маркази муҳокимаҳо ҳамчунин масъалаҳои ҳифзи муҳити зист, истифодаи оқилонаи захираҳои табиӣ ва ҷорӣ намудани усулҳои инноватсионии пешбурди кишоварзӣ қарор доштанд. Коршиносон бар онанд, ки барои Тоҷикистон, ки қисми зиёди аҳолии он дар деҳот зиндагӣ мекунад, навсозии бахши аграрӣ бевосита бо масъалаҳои рушди устувори иқтисодӣ ва суботи иҷтимоӣ алоқаманд аст.

Ҷонибҳо ба густариши минбаъдаи ташаббусҳои муштарак, ки ба таҳкими амнияти озуқаворӣ ва баланд бардоштани устувории кишоварзӣ ба хатарҳои иқлимӣ ва иқтисодӣ равона шудаанд, изҳори ҳавасмандӣ карданд.

Аҳамияти махсуси Конфронси кунунии ФАО дар Душанбе дар он аст, ки минтақаи Аврупо ва Осиёи Марказӣ имрӯз бо зарурати тағйироти амиқи низомҳои агросаноатӣ дар шароити тағйирёбии иқлим, афзоиши таҳдидҳои глобалӣ ва ноустувории бозорҳои ҷаҳонӣ рӯ ба рӯ мебошад.

Ба андешаи таҳлилгарон, баргузории чунин ҳамоиши бузурги байналмилалӣ дар Душанбе аз болоравии нуфузи Тоҷикистон дар масъалаҳои дипломатияи об, иқлим ва амнияти озуқаворӣ шаҳодат медиҳад. Ташаббусҳои байналмилалии Президенти Ҷумҳурии Тоҷикистон муҳтарам Эмомалӣ Раҳмон дар соҳаи об ва рушди устувор мавқеи кишварро дар рӯзномаи ҷаҳонии экологӣ ва озуқаворӣ боз ҳам таҳким мебахшанд.

Конфронси 35-уми минтақавии ФАО барои Аврупо ва Осиёи Марказӣ аз 11 то 15 май дар Душанбе идома мекунад. Дар меҳвари рӯзномаи он — амнияти озуқаворӣ, рушди деҳот, истифодаи самараноки захираҳои табиӣ ва ҷустуҷӯи роҳҳалҳои устувор барои ояндаи бахши аграрӣ қарор доранд.

АКС: АМИТ «Ховар»