Душанбе, 06 март, – АИ «Корвон Иттилоот». Дар пойтахти Тоҷикистон натиҷаҳои ҷаласаи чордаҳуми Комиссияи муштараки байниҳукуматии Ҷумҳурии Тоҷикистон ва Туркманистон оид ба ҳамкории тиҷоратию иқтисодӣ ва илмию техникӣ ҷамъбаст гардида, Протоколи дахлдор ба имзо расонида шуд. Ин ҷаласа ҳамчун марҳилаи муҳими рушди робитаҳои дуҷонибаи иқтисодӣ ва тавсеаи ҳамкории соҳавӣ байни ду кишвари ҳамсоя арзёбӣ мегардад.

Тавре Вазорати энергетика ва захираҳои оби Ҷумҳурии Тоҷикистон иттилоъ медиҳад, музокироти ҳайатҳои ду кишвар дар фазои созанда, ҳамдигарфаҳмӣ ва руҳияи ҳамкории мутақобилан судманд баргузор гардид.

Дар ҷаласа ҳамраисони Комиссия — муовини Сарвазири Ҷумҳурии Тоҷикистон Сулаймон Зиёзода ва муовини Раиси Девони вазирони Туркманистон Тангригулӣ Атахаллиев иштирок намуда, ҷараён ва натиҷаҳои гуфтушунидҳоро мусбат арзёбӣ карданд. Ба гуфтаи онҳо, баррасии масъалаҳои муҳими ҳамкорӣ дар бахшҳои иқтисодӣ, тиҷоратӣ ва илмӣ-техникӣ барои таҳкими муносибатҳои дуҷониба ва густариши робитаҳои байниидоравӣ заминаи боэътимод фароҳам меорад.

Зимни ҷаласа ҷонибҳо маҷмӯи масъалаҳои марбут ба рушди ҳамкории иқтисодӣ, афзоиши гардиши мол байни ду кишвар, ҳамкории саноатӣ, энергетика, нақлиёт, илм ва технологияро мавриди муҳокима қарор доданд. Тавре таъкид гардид, Тоҷикистон ва Туркманистон дорои имкониятҳои васеи ҳамкорӣ дар соҳаҳои гуногун мебошанд ва истифодаи самараноки ин иқтидор метавонад ба густариши ҳамкории минтақавӣ мусоидат намояд.

Пас аз мувофиқаи ҳамаи масъалаҳои рӯзномаи ҷаласа, аз ҷониби ҳамраисони Комиссия Протоколи ҷаласаи чордаҳуми Комиссияи муштараки байниҳукуматии Тоҷикистон ва Туркманистон оид ба ҳамкории тиҷоратию иқтисодӣ ва илмию техникӣ ба имзо расонида шуд. Ин санад самтҳои асосии фаъолияти минбаъдаи ҳамкориро муайян намуда, ҳамчун қадами муҳими таҳкими муносибатҳои дӯстона ва рушди шарикии стратегӣ байни ду кишвар арзёбӣ мегардад.

Ба таъкиди ҷонибҳо, иҷрои саривақтӣ ва босамари тавофуқоти дар ин ҳуҷҷат пешбинишуда метавонад ба густариши ҳамкории иқтисодию иҷтимоӣ, афзоиши ҳаҷми савдои дуҷониба, рушди робитаҳои истеҳсолӣ ва илмию техникӣ, инчунин ба таҳкими робитаҳои минтақавӣ байни Тоҷикистон ва Туркманистон мусоидат намояд.

Коршиносон бар ин назаранд, ки фаъол гардидани фаъолияти комиссияҳои байниҳукуматӣ дар чунин сатҳ барои густариши муносибатҳои иқтисодӣ ва рушди лоиҳаҳои муштарак аҳамияти муҳим дошта, ба устувории ҳамкории дарозмуддати ду кишвар мусоидат мекунад.

АКС: Вазорати энергетика ва захираҳои оби Ҷумҳурии Тоҷикистон