Душанбе, 29 июн, – АИ «Корвон Иттилоот». Дар Қӯшунҳои дохилии Вазорати корҳои дохилии Ҷумҳурии Тоҷикистон барномаи густурдаи чорабиниҳо бахшида ба Рӯзи Ваҳдати миллӣ бо ҷамъбасти бошукӯҳ анҷом ёфт.

Нуқтаи авҷи ин силсила чорабиниҳо ҳамоиши тантанавӣ дар қисми ҳарбии №3502 гардид, ки ҳайати фармондеҳӣ, хизматчиёни ҳарбӣ, собиқадорон ва чеҳраҳои маъруфи ҷомеаро атрофи як ғояи меҳварӣ — ҳифзи сулҳ, субот ва давлатдории миллӣ ҳамчун арзиши олӣ муттаҳид намуд.

Аз 20 то 27 июни соли 2026 дар тамоми ҷузъу томҳои Қӯшунҳои дохилӣ «Ҳафтаи Ваҳдат» баргузор шуд. Дар доираи ин ташаббуси ватандӯстона барои сарбозону афсарон дарсҳои шуҷоат, мусобиқаҳои ҳарбӣ-варзишӣ, озмунҳои маърифатӣ ва чорабиниҳои тарбиявӣ таҳти шиори «Дар иттиҳод — қудрат аст!» роҳандозӣ гардиданд. Таваҷҷуҳи асосӣ ба омӯзиши воқеаҳои фоҷиабори солҳои навадум равона шуда буд, то насли ҷавони ҳомиёни Ватан арзиши сулҳу ризоияти миллиро амиқтар дарк намояд.

Маросими асосии идона рӯзи 27 июн дар доираи ҳамоиши «Ваҳдати миллӣ — пояи устувори давлат» баргузор гардид. Фармондеҳи Қӯшунҳои дохилӣ генерал-майор Сӯҳроб Орзу Рауфзода зимни сухани ифтитоҳӣ, ки худ шоҳиди бевоситаи солҳои вазнини муқовиматҳои дохилӣ мебошад, таъкид кард, ки сулҳу ваҳдати миллӣ натиҷаи сиёсати хирадмандона ва талошҳои пайгиронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аст. Ба гуфтаи ӯ, ҳифзи ин дастоварди таърихӣ имрӯз вазифаи муқаддаси ҳар як хизматчии ҳарбӣ мебошад.

Суханрониҳои меҳмонони фахрӣ ба ҳамоиш мазмуни амиқи сиёсиву маънавӣ бахшиданд. Генерал-майори мустаъфӣ Аҳтамшо Саидшарифов Ваҳдати миллиро яке аз дастовардҳои бузургтарини таърихи навини Тоҷикистон арзёбӣ намуда, изҳор дошт, ки хизматчиёни Қӯшунҳои дохилӣ сипари боэътимоди давлат ва кафили суботи ҷомеа мебошанд.

Раиси ташкилоти ҷамъиятии «Маъюбони ҷанг дар Афғонистон» Ҳикматулло Мирзоев, ки даҳшати ҷангро бо чашми худ дидааст, таъкид кард, ки сулҳ арзишмандтарин неъмати ҳар миллат буда, ҷанг ҳамеша танҳо харобиву фоҷиа ба мерос мегузорад.

Таваҷҷуҳи махсуси иштирокчиёнро суханронии ректори Донишкадаи исломии Тоҷикистон ба номи Имоми Аъзам Абдуалим Аҳтамзода ҷалб намуд. Ӯ масъалаҳои ваҳдати миллӣ ва ҳифзи Ватанро аз дидгоҳи таълимоти дини мубини ислом шарҳ дода, бо истинод ба оятҳои Қуръони Карим ва ҳадисҳои Паёмбари акрам (с) таъкид кард, ки сулҳ, ҳамдигарфаҳмӣ ва ҳифзи Ватан аз арзишҳои волои исломӣ буда, ифротгароӣ ва тафриқаандозӣ ба асли дини ислом ҳеҷ иртибот надоранд.

Роҳбари Дастгоҳи Иттифоқи ҷавонони Тоҷикистон Раҷабалӣ Турсунзода дар муроҷиат ба сарбозони ҷавон изҳор дошт, ки маҳз насли имрӯза масъулияти ҳифзи сулҳу Ваҳдати миллӣ ва идомаи роҳи созандагиро бар дӯш дорад. Ба гуфтаи ӯ, Ваҳдати миллӣ барои ҷавонон танҳо мероси таърихӣ набуда, балки рисолати муқаддас дар назди фардои давлатдории миллӣ мебошад.

Ҳамоиш бо маросими қадрдонии меҳмонон ва собиқадорон анҷом ёфт. Аз номи Фармондеҳи Қӯшунҳои дохилӣ як қатор шахсони фаъол барои хизмати содиқона, саҳм дар таҳкими амнияти ҷомеа ва тарбияи ватандӯстонаи ҷавонон бо медалҳои ҷашнӣ ва Ифтихорномаҳо сарфароз гардонида шуданд.

Чорабиниҳои идона бори дигар пайванди мустаҳками наслҳои ҳомиёни Ватанро инъикос намуда, собит сохтанд, ки ҳифзи сулҳ, суботи ҷомеа ва Ваҳдати миллӣ ҳамчун пояи асосии рушди минбаъдаи Тоҷикистони соҳибистиқлол ҳамоно яке аз вазифаҳои муқаддаси давлат ва ҷомеа боқӣ мемонад.

Акс: Қӯшунҳои дохилии Вазорати корҳои дохилии Ҷумҳурии Тоҷикистон