Jamshid Xo‘jayev rahbarligidagi O‘zbekiston delegatsiyasining AQShga tashrifi doirasida yirik Amerika kompaniyalari vakillari ishtirokida davra suhbati o‘tkazildi.

Uchrashuvda Komatsu, JP Morgan, dōTERRA singari korporatsiyalar hamda Minnesota shtatining soya ishlab chiqaruvchilar uyushmasi kabi 40 dan ortiq kompaniya rahbarlari qatnashdi. Shuningdek, tadbirda Oq uy mutaxassislari, AQSH Savdo vazirligi vakillari va O‘zbekiston-Amerika savdo palatasi rahbariyati ham ishtirok etdi.

Amerika tomoni O‘zbekistonning Jahon savdo tashkilotiga a’zo bo‘lishi bo‘yicha muzokaralar yakunlanganini yuqori baholab, bu respublikaning xalqaro iqtisodiy aloqalarini mustahkamlashga xizmat qilishini ta’kidladi.

O‘zbekiston o‘z navbatida islohotlardagi yutuqlarini va xorijiy investorlar uchun yaratilgan imkoniyatlarni taqdim etdi. Tog‘-kon sanoati, axborot texnologiyalari, qishloq xo‘jaligi va boshqa sohalardagi qo‘shma loyihalar istiqbollari ko‘rsatib o‘tildi.

Davra suhbati yakunida tomonlar kelgusi yilga mo‘ljallangan, mamlakatlar o‘rtasidagi ishbilarmonlik aloqalarini yanada mustahkamlaydigan qo‘shma tadbirlar rejasini ishlab chiqishga kelishib oldilar.