Bryusselda “O‘zbekiston — Yevropa Ittifoqi” parlament hamkorligi qo‘mitasining 17-majlisi bo‘lib o‘tdi. Unda O‘zbekiston Respublikasi Oliy Majlisi delegatsiyasi Senat raisining birinchi o‘rinbosari Sodiq Safoyev rahbarligida ishtirok etdi.

Yig‘ilishda ikki tomonlama hamkorlikning dolzarb masalalari va uni rivojlantirish istiqbollari ko‘rib chiqildi. Ishtirokchilar sheriklik munosabatlarini mustahkamlashda erishilgan sezilarli yutuqlarni ta’kidlab, hamkorlikning ustuvor yo‘nalishlariga alohida e’tibor qaratdilar.

Asosiy mavzular parlamentlararo muloqotni mustahkamlash, shuningdek, barqaror rivojlanish, savdo, energetika va atrof-muhitni muhofaza qilish sohalarida hamkorlikda ish olib borish masalalari bo‘ldi.

Tomonlar Parlament hamkorligi qo‘mitasining navbatdagi majlisini 2025-yilda O‘zbekistonda o‘tkazishga kelishib oldilar.