Birlashgan Millatlar Tashkilotining Iqlim bo‘yicha konferensiyasida (COP29) Ozarbayjon, Qirg‘iziston, Tojikiston va O‘zbekiston ekologiya vazirlarining uchrashuvi bo‘lib o‘tdi, unda Markaziy va G‘arbiy Osiyo mamlakatlarining iqlim o‘zgarishi, muzliklarni saqlash va transchegaraviy hamkorlik masalalari bo‘yicha hamkorligi to‘g‘risidagi deklaratsiya imzolandi.

Uchrashuv ishtirokchilari Markaziy Osiyo, Janubiy Kavkaz va Pokiston muzliklarning erishi, suv tanqisligi, cho‘llanish va qishloq xo‘jaligi mahsuldorligining pasayishi kabi iqlim o‘zgarishlarining jiddiy oqibatlariga duch kelayotganini ta’kidladilar. Ushbu mintaqadagi muzliklar qishloq xo‘jaligi, gidroenergetika, suv ta’minoti va turizm uchun suv resurslarini ta’minlashda muhim rol o‘ynaydi.

2025-yildan 2031-yilgacha 3,5 milliard dollar jalb qilishni nazarda tutuvchi “Muzlikdan fermaga” (G2F) tashabbusiga alohida e’tibor qaratildi. Ushbu dastur mamlakatlarni muzliklarning erishi va boshqa iqlim tahdidlari oqibatlariga moslashish, jumladan, suv va yer resurslarini barqaror boshqarish, iqlimga moslashgan infratuzilma va ijtimoiy himoya choralarini qo‘llab-quvvatlashga qaratilgan. Shuningdek, dastur mintaqada suv va oziq-ovqat xavfsizligini mustahkamlashga xizmat qiladi.

Bundan tashqari, uchrashuvda xalqaro hamkorlarga Markaziy va G‘arbiy Osiyoda muzliklarni saqlab qolish va iqlim o‘zgarishiga moslashish bo‘yicha iqlim choralarini amalga oshirish uchun moliyaviy yordam ko‘rsatishni tezlashtirishga chaqiriq bildirildi.