Bokudagi COP29 anjumanida O‘zbekiston Ekologiya vazirligi va Global yashil o‘sish instituti (GGGI) mamlakatning iqlim o‘zgarishiga bardoshliligini oshirish va yashil o‘sishni rivojlantirish maqsadida ikki hujjatga imzo chekdi.

Kelgusi besh yilda GGGIning O‘zbekistondagi faoliyatini belgilab beradigan rejalashtirish hujjati (CPF 2024-2028) hamda suv toshqinlari va qurg‘oqchilik xavfini boshqarish bo‘yicha yangi mintaqaviy loyiha uchun O‘zaro anglashuv memorandumi imzolandi. Mazkur tashabbuslar O‘zbekistonning iqlim xatarlariga qarshi kurashish, barqaror rivojlanishni qo‘llab-quvvatlash va kam uglerodli iqtisodiyotga o‘tish yo‘lidagi intilishlarini namoyon etadi.

CPF 2024-2028 GGGI va O‘zbekiston hukumati hamkorlikda ishlab chiqqan strategik yo‘l xaritasi hisoblanadi. Dastur iqlimga moslashgan qishloq xo‘jaligi, barqaror o‘rmon xo‘jaligi va yashil infratuzilmani qo‘llab-quvvatlashga qaratilgan. KOICA tashkiloti tomonidan qo‘llab-quvvatlanayotgan va Orol dengizining qurishi bilan bog‘liq ekologik muammolarni hal qilishga ko‘maklashadigan “Aral Sea GRIP” loyihasiga alohida e’tibor qaratilmoqda.

Bundan tashqari, suv toshqini va qurg‘oqchilik xavfini boshqarish bo‘yicha 10 million dollarlik loyiha amalga oshiriladi. Koreya Respublikasi Atrof-muhit vazirligi tomonidan qo‘llab-quvvatlanayotgan ushbu loyiha O‘zbekiston va Qirg‘izistonda monitoring va erta ogohlantirishning innovatsion tizimlarini joriy etishni ko‘zda tutadi. Bu har ikki mamlakatda suv resurslarini boshqarish va iqlim o‘zgarishiga moslashishni yaxshilash imkonini beradi.

Tadbir doirasida yashil investitsiyalarni ko‘paytirish va kam uglerodli rivojlanish sohasida O‘zbekistonning mavqeini mustahkamlash imkoniyatlari ham muhokama qilindi. Anjumanda Markaziy Osiyoda iqlim xatarlariga qarshi kurashish va barqaror o‘sishni ta’minlash uchun hamkorlik va innovatsiyalarning ahamiyati alohida ta’kidlandi.