MOSKVA, 2026-yil 9-may – Karavan Info axborot agentligi. Moskvada boʻlib oʻtgan uchrashuvda Oʻzbekiston va Rossiya rahbarlari avval erishilgan kelishuvlarning bajarilishini koʻrib chiqdilar, asosiy eʼtibor savdo, sanoat hamkorligi va madaniy-gumanitar aloqalarga qaratildi.

O‘zbekiston prezidenti Shavkat Mirziyoyev 8 may kuni Moskvada Rossiya prezidenti Vladimir Putin bilan uchrashdi.

Suhbat avvalida davlat rahbarlari Ikkinchi jahon urushidagi Gʻalabaning 81 yilligi bilan bir-birlarini samimiy tabrikladilar.

Muzokaralar davomida Oʻzbekiston-Rossiya har tomonlama strategik sheriklik va ittifoqchilik munosabatlarini yanada mustahkamlash, shuningdek, avvalgi oliy darajadagi uchrashuvlarda erishilgan kelishuvlarni amalga oshirish masalalariga eʼtibor qaratildi.

Rahbarlar oʻzaro savdoning barqaror oʻsib borayotganini hamda sanoat, energetika, metallurgiya va boshqa sohalardagi qoʻshma loyihalarning muvaffaqiyatli amalga oshirilayotganini mamnuniyat bilan qayd etdilar.

Yuqori savdo aylanmasi dinamikasini saqlab qolish, ustuvor tarmoqlarda hamkorlik loyihalarini amalga oshirishni jadallashtirish va ikki mamlakat hududlari o'rtasida faol hamkorlikni davom ettirish zarurligi ta'kidlandi.

Shavkat Mirziyoyev va Vladimir Putin ikki tomonlama munosabatlarning muhim qismi bo'lib qolayotgan madaniy-gumanitar hamkorlikni kengaytirish masalalarini ham muhokama qilishdi.

Uchrashuv yakunida prezidentlar xalqaro kun tartibidagi dolzarb masalalar bo'yicha fikr almashdilar.

Surat: Oʻzbekiston Prezidenti matbuot xizmati