2024-yil 29-oktyabr kuni Lloyd’s of London bosh qarorgohidagi The Old Library tarixiy zalida “O‘zbekinvest” kompaniyasi tomonidan “O‘tish iqtisodiyotiga ega mamlakatlar sug‘urta bozoridagi ustuvor tendensiyalar. O‘zbekiston tajribasi” mavzusida taqdimot o‘tkazildi. Tadbirda sug‘urta, qayta sug‘urta, brokerlik xizmatlari va xatarlarni boshqarish sohasidagi xalqaro mutaxassislar ishtirok etdilar.

1688-yilda tashkil etilgan Lloyd’s of London tijorat sug‘urtasi va qayta sug‘urtasi jahon bozorining 20 foizini qamrab olgan bo‘lib, 2023-yil yakuni bo‘yicha umumiy sug‘urta mukofotlari 66,3 milliard AQSH dollarini tashkil etgan. London sug‘urta instituti ko‘magida tashkil etilgan taqdimotni “O‘zbekinvest” global qayta sug‘urtalash va xalqaro aloqalar markazi direktori Anvar Umarov olib bordi.

Taqdimotda 2017-yildan buyon jadal rivojlanayotgan O‘zbekiston iqtisodiyoti va uning sug‘urta sohasidagi islohotlariga alohida e’tibor qaratildi. Prezident Shavkat Mirziyoyev tashabbusi bilan boshlangan islohotlar sug‘urta bozorining rivojlanishi va modernizatsiyasiga, uni xalqaro standartlarga moslashtirish hamda xorijiy investitsiyalarni jalb qilishga xizmat qildi.

Sug‘urta xizmatlari hajmining har yili 40 foizga oshishi, shuningdek, O‘zbekistonning jahon sug‘urta bozoriga faol integratsiyalashuvi asosiy yutuqlardan biri bo‘ldi. Taqdimotda, shuningdek, ‘O‘zbekinvest‘ning ushbu sohani rivojlantirishga qo‘shgan hissasi ta’kidlandi. Kompaniyaning yaqinda Chartered Insurance Institute tomonidan xalqaro professional hamkor maqomini olganligi uning yuqori darajadagi professionalligini tasdiqlaydi.