Shavkat Mirziyoyev Rossiyadan kelgan ikki nafar mashhur san’at arbobini “Do‘stlik” ordeni bilan taqdirlash to‘g‘risida farmon imzoladi. Ushbu mukofot ularga O‘zbekiston va Rossiya xalqlari o‘rtasidagi strategik hamkorlik va do‘stlikni mustahkamlashdagi xizmatlari, shuningdek, madaniyatni rivojlantirish va ma’naviy qadriyatlarni saqlashga qo‘shgan hissasi uchun topshirildi.

Mukofotga Rossiya Federatsiyasining xalq artisti, Moskva drama teatrining badiiy rahbari hamda taniqli teatr va kino aktyori Sergey Bezrukov, shuningdek, Rossiya Federatsiyasining xalq artisti, mashhur balet raqqosi va rejissyor Andris Liepa sazovor bo‘ldi.

Ularning ijodi va madaniy hayotdagi faol ishtiroki ikki mamlakat o‘rtasidagi aloqalarni mustahkamlashga, san’at sohasidagi hamkorlikni kengaytirishga va an’analarni boyitishga xizmat qilmoqda.