Transport vaziri o‘rinbosari Jasurbek Choriyev O‘mon Sultonligining O‘zbekistondagi Favqulodda va Muxtor elchisi Vafo Jabra Nasser Al-Busaidiy hamda O‘zbekiston-Omon investitsiya kompaniyasining bosh ijrochi direktori Umar Bahrom bilan uchrashdi.

Uchrashuv davomida tomonlar investitsiyaviy hamkorlikni, ayniqsa, logistika va transport infratuzilmasi sohalarida kengaytirish masalalarini muhokama qildilar.

Uchrashuv qatnashchilari viza tartibini soddalashtirish va infratuzilmani rivojlantirishga sarmoyalarni ko‘paytirish muhimligini ta’kidladilar. Ularning fikricha, bu mamlakatlar o‘rtasida yo‘lovchi va yuk tashish hajmini sezilarli darajada oshirish imkonini beradi. Shuningdek, Masqat va Toshkent, hamda O‘zbekistonning boshqa shaharlari o‘rtasida muntazam aviaqatnovlarni yo‘lga qo‘yish masalasi ham muhokama qilindi. Bu ikki mamlakat o‘rtasidagi transport sohasidagi hamkorlikni yanada rivojlantirishga xizmat qilishi ta’kidlandi.