O‘zbekiston Investitsiyalar, sanoat va savdo vazirligi delegatsiyasi Anqara va Istanbul shaharlarida bo‘lib, Turkiya vazirliklari, idoralari va ishbilarmon doiralari vakillari bilan bir qator uchrashuvlar o‘tkazdi.

Turkiya savdo vaziri o‘rinbosari Mustafo Tuzju bilan muzokaralar chog‘ida mamlakatlar o‘rtasidagi savdo hajmini oshirish masalalari muhokama qilindi. So‘nggi besh yilda ikki tomonlama tovar ayirboshlash 30 foizga o‘sib, 3 milliard dollardan oshdi. Tomonlar tovarlar assortimentini kengaytirish, elektron tijoratni ilgari surish va mahsulotlarning bozorlarga erkin kirishi uchun to‘siqlarni olib tashlashga kelishib oldilar.

Shuningdek, qishloq xo‘jaligini davlat tomonidan qo‘llab-quvvatlash, jumladan, O‘zbekiston qo‘llamoqchi bo‘lgan sug‘urta tizimini joriy etish bo‘yicha Turkiya tajribasiga to‘xtalib o‘tildi. Yaqin kelajakda seleksiya-sinov markazi tashkil etish rejalashtirilgan.

Turkiyaning yirik kompaniyalari rahbarlari bilan muzokaralar sog‘liqni saqlash, elektr energetikasi, qishloq xo‘jaligi mahsulotlarini qayta ishlash, oziq-ovqat, qurilish materiallari, kimyo mahsulotlari va mineral o‘g‘itlar ishlab chiqarish sohalarida qo‘shma loyihalarni amalga oshirish bo‘yicha kelishuvlarga olib keldi.