O‘zbekiston xalq artisti, taniqli aktyor va dublyaj ustasi To‘lqin Tojiyev 89 yoshida olamdan o‘tdi. Bu haqda O‘zbekiston Milliy akademik drama teatri matbuot xizmati xabar berdi.

Tojiyev butun umrini teatrga bag‘ishlab, Milliy drama teatri sahnasida yuzdan ortiq yorqin obrazlarni yaratdi. Uning eng mashhur rollari orasida «Revizor»dagi Bobchinskiy va Xlestakov, «Hamlet»dagi Ozrik, «Qirol Lir»dagi Edgar, «Otello“dagi Yago, shuningdek, “Alisher Navoiy”, “Mirzo Ulug‘bek” va boshqa ko‘plab spektakllardagi asosiy qahramonlar bor.

Uning ijodida dublyaj ishi alohida o‘rin egallagan. Aktyor tufayli minglab milliy va xorijiy filmlar qahramonlarining ovozlari o‘zbek tilida yangradi, jumladan “Qalqon va qilich”, “Ivan Vasilevich kasbini o‘zgartirmoqda”, “Afonya” va “Ram va Sham” kabi mashhur asarlar.

1988-yilda Tojiyev O‘zbekiston xalq artisti unvoniga sazovor bo‘ldi, 1997-yilda esa madaniyat va san’at rivojiga qo‘shgan hissasi uchun “Do‘stlik” ordeni bilan taqdirlandi.