Oliy Majlis Qonunchilik palatasining yig‘ilishida maishiy chiqindilarni yig‘ish va olib chiqish xizmatlariga haq to‘lash intizomini kuchaytirish maqsadidagi qonun loyihasi birinchi o‘qishda ko‘rib chiqildi.

Qonun loyihasiga ko‘ra, chiqindi chiqarish to‘lovini elektr energiyasi hisobvaraqlari bilan birlashtirish taklif etilmoqda. Sanitariya-tozalash xizmatlari uchun qarz mavjud bo‘lsa, u to‘lanmaguncha elektr energiyasiga haq to‘lash imkoniyati vaqtincha cheklanadi. Aholi bu haqda SMS orqali xabardor qilinadi.

Bundan tashqari, maxsus texnikalar ishini nazorat qilish uchun GPS-navigatsiya tizimini joriy etish ko‘zda tutilgan. Faqat tizim tomonidan tasdiqlangan va tozalash ishlari suratga olingan reyslar hisob-kitoblarda inobatga olinadi. Bu xizmatlar uchun adolatli haq to‘lanishini ta’minlashi kerak.

Qonun loyihasi yangi qoidalarni bosqichma-bosqich joriy etishni nazarda tutadi. Ular 2024-yil boshidan yirik shaharlarda, 2025-yildan esa butun mamlakat bo‘ylab amalda bo‘ladi, shu jumladan har oylik qarzlarni nazorat qilish ham yo‘lga qo‘yiladi.

O‘zgarishlardan ko‘zlangan maqsad — sanitariya xizmatlari uchun qarzlar to‘planishini kamaytirish, ularning sifatini yaxshilash va sohaga sarmoyalar jalb qilish uchun sharoit yaratishdan iborat.