Yangilangan Konstitutsiyaga muvofiq, O‘zbekistonda xalq deputatlari mahalliy Kengashlarida hokimlarning raislik qilish amaliyoti bosqichma-bosqich bekor qilinmoqda. Joriy yildan boshlab bu yangilik viloyat va Toshkent shahar Kengashlariga tatbiq etiladi, 2026-yildan esa tuman va shahar Kengashlarini ham qamrab oladi.

Oliy Majlis Senatida Kengashlar raislari va kotibiyatlari boshliqlari uchun ikki kunlik seminar o‘tkazilmoqda. Tadbir mahalliy vakillik organlarini rivojlantirish, ularning ijtimoiy va iqtisodiy vazifalarni hal etishdagi rolini kuchaytirish, shuningdek, mahalliy hokimiyat organlari bilan o‘zaro hamkorlikni yo‘lga qo‘yish masalalariga bag‘ishlangan.

Senat Raisi Tanzila Narbayeva Prezident Shavkat Mirziyoyev tashabbusi bilan boshlangan islohotlar mahalliy Kengashlarning jamiyat hayotidagi o‘rnini oshirishga qaratilganini ta’kidladi. Uning aytishicha, vakillik organlari faoliyati aholi manfaatlarini himoya qilish, deputatlar va fuqarolik jamiyati institutlari bilan samarali hamkorlik o‘rnatish, shuningdek, saylovchilar muammolarini hal etishga yo‘naltirilishi lozim.

Seminarda mahalliy byudjetlar ijrosini nazorat qilish, qonunlar va hududiy dasturlarning bajarilishi, shuningdek, ijro hokimiyati rahbarlarining hisobotlarini tinglash mexanizmlari muhokama qilindi. Vakillik organlarining faolligini oshirishga qaratilgan “Kuchli Kengash, hisobdor va tashabbuskor hokim” tamoyiliga alohida e’tibor qaratildi.

Senat, vazirlik va idoralar mutaxassislari Kengashlar faoliyatida ochiqlik va shaffoflikni ta’minlash, jamoatchilik fikrini inobatga olish hamda qonuniylikka qat’iy rioya etish zarurligini ta’kidlashdi.