Toshkentdagi Olimpiya va Paralimpiya shon-shuhrati muzeyida “Milliy sport mukofoti-2024” g‘oliblarini taqdirlash marosimi bo‘lib o‘tdi. Marosim davomida o‘tgan yilning sport yutuqlari sarhisob qilindi.

Joriy yilda jahon chempionatlarida yuksak natijalarga erishgan sportchilarga Prezident qaroriga ko‘ra bir martalik pul mukofotlari topshirildi. So‘ngra turli nominatsiyalar bo‘yicha mukofot sovrindorlari e’lon qilindi. Abduqodir Husanov yilning eng yaxshi yosh sportchisi, Asadbek Toshtemirov esa eng yaxshi yosh para-sportchi deb tan olindi. Olimpiada bo‘lmagan sport turlari bo‘yicha eng yaxshi terma jamoa O‘zbekiston shaxmat terma jamoasi, Paralimpiya bo‘lmagan sport turlari bo‘yicha esa O‘zbekiston para-shaxmatchilar jamoasi bo‘ldi.

Bundan tashqari, sport yulduzlari, murabbiylar va jurnalistlar ham taqdirlandi. G‘oliblar safida Sitora Turdibekova, Roza Qo‘ziyeva, Diyora Keldiyorova, Hasanboy Do‘smatov, shuningdek, murabbiylar Yahyo Yoqubov va To‘lqin Qilichev ham bor edi.