O‘zbekistonda jamoat tartibini buzishga qarshi choralar kuchaytirildi: ommaviy tartibsizliklarni tashkil etishga o‘rgatish va ularni moliyalashtirish uchun jinoiy javobgarlik joriy etilmoqda.

11-dekabr kuni Oliy Majlis Qonunchilik palatasining majlisida deputatlar Jinoyat kodeksining 244-moddasiga o‘zgartirish kiritishni taklif etuvchi qonun loyihasini ko‘rib chiqib, konseptual jihatdan ma’qulladilar.

Yangi hujjatda ommaviy tartibsizliklarni tashkil etish maqsadida ta’lim olayotgan shaxslar, shuningdek, bunday harakatlarni moliyalashtiruvchilar uchun jazo belgilash nazarda tutilgan. Tashabbuskorlarning fikricha, bunday chora-tadbirlar jamiyat osoyishtaligiga tahdid soluvchi omillarni bartaraf etishga qaratilgan.

Deputatlarning ta’kidlashicha, hozirgi kunda dunyoda ommaviy tartibsizliklar barqarorlik va xavfsizlikka jiddiy tahdid solmoqda. Ko‘pincha ularni faoliyati moliyalashtirilgan maxsus tayyorlangan shaxslar tashkil etadi.

Ilgari O‘zbekiston qonunchiligida ommaviy tartibsizliklarda ishtirok etish, ularni tashkil qilish va fuqarolarga nisbatan zo‘ravonlik ishlatish uchun jazo belgilangan edi. Biroq bunday harakatlarni tayyorlash va moliyalashtirish uchun to‘g‘ridan-to‘g‘ri javobgarlik ko‘zda tutilmagan edi.

Qonun loyihasi birinchi o‘qishda qabul qilindi va qonunchilik jarayonining keyingi bosqichlarida ko‘rib chiqiladi.