O‘zbekiston investitsiyalar, sanoat va savdo vaziri Laziz Qudratov Tokioda Yaponiya hukumati, moliya institutlari va yirik kompaniyalar vakillari bilan uchrashuvlar o‘tkazdi. Uchrashuvlarda iqtisodiyot, moliya va texnologiya sohasida O‘zbekiston-Yaponiya hamkorligining asosiy masalalari muhokama qilindi.

Iqtisodiyot, savdo va sanoat vaziri Yoji Muto hamda infratuzilma va transport vaziri Tetsuo Saito bilan muzokaralarda foydali qazilmalarni qazib olish, kimyo, mashinasozlik va energetika sohasida hamkorlik qilish bo‘yicha kelishuvga erishildi. Tomonlar yangi qurilish standartlari, seysmik xavfsizlik va jamoat transportini boshqarishning ilg‘or tizimlarini yaratish borasida hamkorlik qilishga ham kelishib olishdi. Yaponiyaning IT-kompaniyalari O‘zbekistonning IT-Park Toshkent bilan autsorsing sohasida hamkorlik o‘rnatish uchun tashrif buyurishi va 2027-yilda Yokogamada bo‘lib o‘tadigan Xalqaro meva-sabzavotchilik ko‘rgazmasida O‘zbekiston ishtirok etishi rejalashtirilgan.

JBIC yapon agentligi bilan O‘zbekistondagi yapon kompaniyalari loyihalarini moliyalashtirishni nazarda tutuvchi uch yillik dastur imzolandi. JICA bilan esa muhandislik kadrlarini tayyorlash, sanoat texnoparkini yaratish va “Bitta hudud — bitta mahsulot” dasturini amalga oshirish bo‘yicha kelishuv tuzildi. Ushbu dastur aholini tadbirkorlik asoslariga o‘rgatishga mo‘ljallangan.

Sojitz, Toyota Tsusho, Sumitomo, Jogmec va Itochu kabi yapon kompaniyalari sanoat va infratuzilma sohalarida, shu jumladan davlat-xususiy sheriklik tamoyillari asosidagi loyihalarda ishtirok etadi.