Musobaqa yakunlariga ko‘ra, O‘zbekiston o‘smirlar va yoshlar terma jamoalari 17 ta oltin, 17 ta kumush va 10 ta bronza medali qo‘shib, jami 44 ta medalga sazovor bo‘ldi.

Qatarda o‘tkazilgan og‘ir atletika bo‘yicha o‘smirlar va yoshlar o‘rtasidagi Osiyo chempionati yakuniga yetdi. Musobaqaning so‘nggi kuni O‘zbekiston terma jamoasi uchun g‘oyat muvaffaqiyatli bo‘ldi.

O‘smirlar o‘rtasida +102 kg vazn toifasida bellashgan yosh og‘ir atletikachi Omadillo Olimov ajoyib natija ko‘rsatdi. U dast ko‘tarishda 156 kg, siltab ko‘tarishda 205 kg, jami 361 kg vazn ko‘tardi. Bu natija unga uchta oltin medal qo‘lga kiritish va turnirning mutlaq g‘olibi bo‘lish imkonini berdi. Olimov yoshlar toifasida ham muvaffaqiyatli qatnashib, terma jamoa hisobiga yana uchta bronza medalini qo‘shdi.