Shavkat Mirziyoyev Global oʻzgarishlar instituti raisi, Buyuk Britaniyaning sobiq bosh vaziri Toni Bler bilan uchrashuv oʻtkazdi. Uchrashuvda tomonlar oʻzbek-britan munosabatlarini mustahkamlash istiqbollari va Bler rahbarlik qilayotgan Institut bilan amaliy hamkorlik oʻrnatish imkoniyatlarini muhokama qildilar.

Bler “Yangi Oʻzbekiston” dasturi doirasida amalga oshirilayotgan islohotlarni yuqori baholab, ularni muvaffaqiyatli amalga oshirish uchun ekspert-maslahat yordami koʻrsatishga tayyor ekanligini bildirdi. Hamkorlikning asosiy yoʻnalishlari sifatida transport koridorlarini rivojlantirish, yangi bozorlar uchun imkoniyatlarni kengaytirish, xalqaro toʻlov tizimlarini joriy etish, investitsiya siyosatini samaradorligini oshirish va boshqa muhim masalalar belgilandi.

Ushbu masalalarni yanada batafsil koʻrib chiqish uchun tomonlar tegishli sohadagi ekspertlar darajasida qoʻshimcha uchrashuvlar tashkil etishga kelishib oldilar.