Shavkat Mirziyoyev Toshkent viloyati Zangiota tumanida barpo etilayotgan “Tashkent Pharma Park” innovatsion ilmiy-ishlab chiqarish farmatsevtika klasteriga tashrif buyurdi. Majmua davlatimiz rahbarining 2020-yil yanvardagi qarori asosida tashkil etilgan bo‘lib, shu yilning aprel oyida uning tamal toshi qo‘yilgan edi.

Farmatsevtika tarmog‘ini rivojlantirish agentligi, muzey, kutubxona va boshqa muassasalar joylashgan 11 qavatli ma’muriy binoning qurilishi yakuniga yetkazildi.

Prezident agentlik faoliyati bilan tanishib, loyiha tashabbuskorlari bilan kelgusidagi rejalarni muhokama qildi. Klasterning asosiy maqsadlari farmatsevtika tarmog‘ini rivojlantirish, innovatsiyalarni joriy etish, sifatli mahsulotlar ishlab chiqarish va malakali mutaxassislar tayyorlashdan iborat.

Klasterning 190 gektar sanoat maydonida umumiy qiymati 818 million dollarlik 21 ta loyiha amalga oshirilmoqda. Ular orasida 300 dan ortiq ish o‘rni yaratgan Grand Pharm Logistics Hub distribyutorlik markazi allaqachon o‘z faoliyatini boshlagan. Ishlab chiqarish loyihalari Turkiya, Hindiston, Xitoy, Malayziya, BAA va Rossiyadan kelgan xorijiy hamkorlar bilan hamkorlikda amalga oshirilmoqda.

Joriy yilda ilk talabalarni qabul qilgan Farmatsevtika texnika universitetiga alohida e’tibor qaratildi. Prezidentimiz yoshlar bilan suhbatlashib, xalqaro standartlar asosida mutaxassislar tayyorlashning muhimligini ta’kidladi. Universitet bitiruvchilari Janubiy Koreyaning Yonse va Buyuk Britaniyaning Sanderlend universitetlari kabi dunyoning yetakchi oliy o‘quv yurtlari diplomlarini olish imkoniyatiga ega bo‘ladilar.