Qirg‘iziston Prezidenti Sadir Japarov O‘zbekiston madaniyat vaziri Ozodbek Nazarbekov bilan uchrashuv o‘tkazdi. Japarov 1992-yilda diplomatik munosabatlar o‘rnatilganidan buyon Qirg‘iziston va O‘zbekiston o‘rtasidagi hamkorlik yangi bosqichga ko‘tarilganini ta’kidladi.

Prezident yaqinda O‘zbekistonda Qirg‘iziston madaniyati kunlari o‘tkazilganini, ular doirasida ikki xalq do‘stligiga bag‘ishlangan ko‘rgazmalar, filmlar namoyishi va tantanali konsert bo‘lib o‘tganini eslatdi. U 2025-yilda Qirg‘izistonda o‘tkazilishi rejalashtirilgan O‘zbekiston madaniyati kunlari munosabatlarni mustahkamlashda muhim voqea bo‘lishiga ishonch bildirdi.

Japarov Nazarbekovga “Qirg‘iziston Respublikasi xalq artisti” unvonini berganini ma’lum qilib, vazirning mamlakatlar o‘rtasidagi madaniy aloqalarni rivojlantirishga qo‘shgan katta hissasini alohida ta’kidladi.

Nazarbekov, o‘z navbatida, o‘z faoliyatiga berilgan yuksak baho uchun minnatdorchilik bildirib, xalqlar o‘rtasidagi qardoshlik munosabatlarini bundan buyon ham mustahkamlashga so‘z berdi. U Japarovning O‘zbekistonga tashrifi ikki mamlakat strategik hamkorligi tarixida yangi sahifa ochganini ta’kidladi.

Vazir, shuningdek, ijodi har ikki xalqqa yaqin bo‘lgan buyuk qirg‘iz yozuvchisi Chingiz Aytmatov tavalludining 100 yilligiga bag‘ishlangan tadbirlarning ahamiyatini qayd etdi. Bundan tashqari, Nazarbekov O‘zbekiston va Qirg‘izistonning yetakchi teatrlari ikki davlat ijodiy hamkorligining ramzi bo‘ladigan qo‘shma teatr loyihasini yaratish ustida ish olib borayotganini ma’lum qildi.