Raqamli texnologiyalar vaziri Sherzod Shermatov TBC Group rahbariyati, jumladan, xalqaro operatsiyalar boshqarmasi boshlig‘i Oliver Xyuz, TBC Group O‘zbekiston bosh direktori Nika Kurdiani va TBC Bank O‘zbekiston bosh direktori o‘rinbosari hamda risk-menejeri Hikoyat Mullajonova bilan uchrashuv o‘tkazdi.

Uchrashuvda O‘zbekistonning raqamli iqtisodiyot sohasidagi yutuqlari, zamonaviy texnologiyalarni joriy etish va raqamli xizmatlarni rivojlantirishda sun’iy intellektning o‘rni muhokama qilindi. Raqamli bank xizmatlarini kengaytirish, ilg‘or texnologiyalarni tatbiq etish hamda moliyaviy xizmatlar qulayligi va xavfsizligini oshirishga alohida e’tibor qaratildi.

Shuningdek, mijozlar ehtiyojlarini tahlil qilish, xatarlarni baholash va moliyaviy qarorlar samaradorligini oshirish uchun sun’iy intellektdan foydalanish imkoniyatlari ko‘rib chiqildi. Tomonlar davlat va korporativ tuzilmalar manfaatlari yo‘lida ma’lumotlarni xavfsiz saqlash va ulardan samarali foydalanish imkonini beruvchi bulutli texnologiyalarni joriy etish bilan bog‘liq istiqbolli loyihalarni muhokama qildilar.

Uchrashuv ishtirokchilari moliya sohasida jarayonlarni avtomatlashtirish, mijozlarga xizmat ko‘rsatishni takomillashtirish va xavfsizlikni ta’minlash uchun sun’iy intellektning muhimligini ta’kidladilar.