Senatning Sud-huquq masalalari va korrupsiyaga qarshi kurashish qo‘mitasi yig‘ilishida ‘2025-yil uchun O‘zbekiston Respublikasi Davlat byudjeti to‘g‘risida‘gi qonun loyihasi ko‘rib chiqildi. Senatorlar byudjetning davlatning ijtimoiy majburiyatlarini bajarish, fuqarolarni qo‘llab-quvvatlash va tadbirkorlikni rivojlantirishga qaratilganligini ta’kidladilar.

Byudjetni shakllantirish va ijro etishda aholining ishtirokini ta’minlash mexanizmlarini joriy etish, mablag‘lardan samarali foydalanishni nazorat qilishga alohida e’tibor qaratildi.

Shaffoflikni oshirish, korrupsiyaga qarshi kurashish, ma’muriy jarayonlarni soddalashtirish va davlat xizmatlari sifatini yaxshilash bo‘yicha chora-tadbirlar muhokama qilindi. Ushbu vazifalarni raqamli texnologiyalar yordamida hal etish va inson omili ta’sirini kamaytirish rejalashtirilmoqda.

Bolalar nafaqalari, kam ta’minlangan oilalarga yordam, bolalar uylarini saqlash va voyaga yetmaganlarni qo‘llab-quvvatlash xarajatlarini moliyalashtirish saqlab qolinishi alohida ta’kidlandi.

Senatorlar kelgusi yilda byudjet mablag‘larini taqsimlash va ulardan foydalanish samaradorligini oshirish yuzasidan tavsiyalar berdilar.