Toshkent, 2026-yil 30-iyul – Karavan Info axborot agentligi. Oʻzbekiston Prezidenti Shavkat Mirziyoyev Qirgʻiziston Prezidenti Sadir Japarovning taklifiga binoan 30-iyuldan 1-avgustgacha Qirgʻiziston Respublikasiga davlat tashrifi bilan boradi.

Oliy darajadagi muzokaralar davomida davlat rahbarlari Oʻzbekiston-Qirgʻiziston munosabatlarini yanada rivojlantirish, jumladan, doʻstlik, yaxshi qoʻshnichilik va strategik sheriklikni mustahkamlash masalalarini muhokama qiladilar.

Oʻzaro savdoni kengaytirish, sanoat kooperatsiyasini rivojlantirish, transport aloqalarini yaxshilash va madaniy-gumanitar hamkorlikni faollashtirishga alohida eʼtibor qaratiladi.

Bundan tashqari, ikki mamlakat rahbarlari mintaqaviy va xalqaro kun tartibidagi dolzarb masalalar bo'yicha fikr almashadilar.

Muzokaralar yakunida Oʻzbekiston va Qirgʻiziston oʻrtasidagi hamkorlikni yanada kengaytirishga qaratilgan ikki tomonlama hujjatlar toʻplami imzolanishi kutilmoqda.

Tashrif dasturiga Shavkat Mirziyoyevning Markaziy Osiyo va Ozarbayjon davlat rahbarlarining norasmiy maslahat uchrashuvida, shuningdek, boshqa rasmiy tadbirlarda ishtirok etishi ham kiritilgan.

Surat: Oʻzbekiston Prezidenti matbuot xizmati