Toshkentda O‘zbekiston o‘rmonlarida zamonaviy texnologiyalardan foydalanib karbonat angidrid gazi miqdorini kuzatish va baholash masalalariga bag‘ishlangan seminar o‘tkazildi.

Tadbir FAO va Global ekologik jamg‘arma ko‘magida Ekologiya vazirligi huzuridagi O‘rmon xo‘jaligi agentligi tomonidan amalga oshirilayotgan “O‘zbekistonning tog‘ va vodiy o‘rmonlarini barqaror boshqarish” loyihasi doirasida bo‘lib o‘tdi. Muhokamada o‘rmon xo‘jaligi mutaxassislari, olimlar va manfaatdor tashkilotlar vakillari ishtirok etdilar.

FAO texnik koordinatori Olimjon Qahhorovning aytishicha, 2018 yilda boshlangan loyiha 157 ming gektar maydonni qamrab olgan va 10 mingga yaqin ish o‘rni yaratgan. Yangi o‘rmonzorlar, pistazorlar va dorivor o‘simliklar plantatsiyalari barpo etildi, shuningdek, ayollar va yoshlar loyiha faoliyatiga jalb qilindi. O‘rmon yerlarini uzoq muddatli ijaraga berish va ularni 2030 yilgacha o‘zlashtirish konsepsiyasi masalalariga alohida e’tibor qaratilmoqda.

Loyiha doirasida O‘zbekiston o‘rmonlari tomonidan yutilayotgan karbonat angidrid gazi hajmini aniqlash va bu borada xalqaro tashkilotlar tajribasini o‘rganishga qaratilgan tadqiqotlar olib borilmoqda. Xalqaro ekspert Eduard Antuan o‘rmonlardagi uglerod zaxiralarini kuzatishni osonlashtiradigan uslubiy tavsiyalar ishlab chiqdi.

Seminar davomida mamlakatning to‘rtta o‘rmon xo‘jaligida o‘rmonlarni barqaror boshqarish rejalari va iqlimni moliyalashtirish tashabbuslari ham taqdim etildi. Mutaxassislar O‘zbekistonning ekologik majburiyatlarini bajarishga ko‘maklashadigan uglerod monitoringi tizimini yaratishga qaratilgan taklif etilgan chora-tadbirlarni muhokama qildilar.