Душанбе, 19 январ, – АИ «Корвон Иттилоот». Дар моҳи октябри соли 2026 дар пойтахти Ҷумҳурии Тоҷикистон — шаҳри Душанбе, Симпозиуми байналмилалии сатҳи баланд дар мавзӯи «Ҷойгоҳ ва арзиши тамаддуни ориёӣ дар таърихи умумибашарӣ — аз дирӯз то имрӯз» баргузор мешавад. Дар кори он олимону муҳаққиқон аз кишварҳои Аврупо, Осиё ва Шарқи Наздик иштирок хоҳанд намуд.

Тибқи иттилои профессор Аскаралӣ Раҷабов, санъатшинос ва доктори илмҳои таърих, мудири шуъбаи таърихи санъати Институти таърих, бостоншиносӣ ва мардумшиносии ба номи А. Дониш, симпозиум платформаи муҳиме барои баррасии ҷанбаҳои гуногуни таҳқиқи осори тамаддуни ориёӣ хоҳад буд.

Ин чорабинӣ дар робита ба дастури Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олӣ, оид ба бунёди Маркази тамаддуни ориёӣ дар пойтахт — шаҳри Душанбе баргузор мегардад.

Бояд тазаккур дод, ки 20 сол пеш, соли 2006, дар Тоҷикистон «Соли арҷгузорӣ ба тамаддуни ориёӣ» эълон шуда буд, ки он бо тантана ҷашн гирифта мешуд. Он замон қадами муҳиме дар сиёсати фарҳангии кишвар гардид ва ба эҳё ва таҳкими арзишҳои қадимии ориёӣ равона шуда буд.

Иқдоми имрӯза нақши таърихии давлатро дар ҳифзи мероси моддӣ ва маънавии фарҳанги ориёии тоҷикон таъкид мекунад. Чорабиниҳои фарҳангӣ ба таҳкими арзишҳои миллӣ, таърихӣ ва фарҳангӣ, рушди илм ва фарҳанг ва баланд бардоштани сатҳи ҳувияти миллии тоҷикон хизмат хоҳанд кард.

Симпозиум барои мубодилаи таҷриба ва баррасии аҳамияти мероси ориёӣ дар заминаи рушди фарҳангӣ ва илмии муосир платформаи муҳиме хоҳад буд.

АКС: https://ru.pinterest.com/