Душанбе, 23 май, – АИ «Корвон Иттилоот». Дар шаҳри Душанбе мактаби технологияҳои рақамии «Мактаби 21» таъсис дода мешавад, ки яке аз бузургтарин лоиҳаҳои таълимӣ дар бахши IT ба ҳисоб рафта, ба омодасозии насли нави мутахассисон барои иқтисоди рақамии кишвар равона шудааст. Лоиҳа бо ташаббуси Агентии инноватсия ва технологияҳои рақамии Тоҷикистон дар ҳамкорӣ бо Хадамоти алоқа ва «Сберобразование РТ» амалӣ мегардад.

Маркази нави таълимӣ дар бинои маркази тиҷоратии Хадамоти алоқа дар хиёбони Рӯдакӣ, 57 ҷойгир мешавад. Фазои таълимӣ барои 200 нафар пешбинӣ гардида, шабонарӯзӣ фаъолият хоҳад кард, то донишҷӯён тавонанд вақти муносибро барои омӯзиш мустақилона интихоб намоянд.

Яке аз хусусиятҳои муҳими лоиҳа омӯзиши комилан ройгон барои ҳамаи шаҳрвандони аз 18-сола боло мебошад. Иштирокчиён метавонанд касбҳои муосири IT-ро аз худ намуда, малакаҳои амалии заруриро барои бозори технологияҳои рақамӣ соҳиб шаванд.

Барномаи таълимӣ бар асоси платформаи байналмилалии рақамӣ таҳия гардида, вобаста ба талаботи бозори меҳнат ва рушди соҳаи технология мунтазам нав карда мешавад. Давомнокии таҳсил аз 9 моҳ то 2 солро ташкил медиҳад ва ба самти интихобшуда ва суръати омӯзиши донишҷӯ вобаста хоҳад буд.

Аз вижагиҳои асосии «Мактаби 21» татбиқи модели «ҳамсол ба ҳамсол» мебошад, ки дар он донишҷӯён тавассути ҳамкорӣ, мубодилаи таҷриба ва иҷрои лоиҳаҳои инфиродӣ ва гурӯҳӣ дониш меомӯзанд. Ин усул имрӯз яке аз шаклҳои муассири таҳсил дар муҳити муосири IT дониста мешавад.

Дар маҷмӯъ, дар мактаб омӯзиш аз рӯи 20 самти технологияҳои рақамӣ ба роҳ монда мешавад — аз барномасозӣ ва таҳлили додаҳо то таҳияи хизматрасониҳои рақамӣ ва дигар ихтисосҳои талаботдошта.

Коршиносон бар ин назаранд, ки роҳандозии чунин лоиҳаҳо нишонаи талоши Тоҷикистон барои суръат бахшидан ба рақамикунонии иқтисод ва коҳиши норасоии мутахассисони соҳавии IT мебошад. Дар шароити густариши хизматрасониҳои рақамӣ, зеҳни сунъӣ ва иқтисоди электронӣ масъалаи омодасозии кадрҳо ба яке аз афзалиятҳои стратегии кишвар табдил меёбад.

Интизор меравад, ки «Мактаби 21» на танҳо маркази таълимӣ, балки майдони нави ташаккули ҷомеаи IT, фарҳанги стартапҳо ва соҳибкории рақамӣ дар Тоҷикистон гардад.

Акс: Агентии инноватсия ва технологияҳои рақамии Ҷумҳурии Тоҷикисто.