Душанбе, 20 июн, – АИ «Корвон Иттилоот». Муносибатҳои Тоҷикистону Гурҷистон ба марҳилаи нави рушд ворид мешаванд. Имрӯз Сарвазири Гурҷистон Ираклий Кобахидзе бо сафари расмӣ 19 июн ба Ҷумҳурии Тоҷикистон ташриф овард. Ин сафар ҳамчун нишонаи талошҳои ду кишвар барои таҳкими муколамаи сиёсӣ, густариши ҳамкориҳои иқтисодию тиҷоратӣ ва рушди робитаҳои гуманитарӣ арзёбӣ мешавад.

Меҳмони олиқадрро дар Фурудгоҳи байналмилалии Душанбе Сарвазири Ҷумҳурии Тоҷикистон Қоҳир Расулзода ва дигар шахсони расмӣ истиқбол гирифтанд.

Ба ифтихори сафари расмӣ ҳудуди фурудгоҳ бо парчамҳои давлатии Тоҷикистон ва Гурҷистон оро ёфта, барои пешвози меҳмони воломақом Горди фахрӣ саф орост. Пас аз садо додани сурудҳои миллии ду давлат муаррифии ҳайатҳои расмии ҷонибҳо баргузор гардид.

Рӯйдоди асосии сафар музокироти сарони ҳукуматҳои ду кишвар хоҳад буд. Интизор меравад, ки Қоҳир Расулзода ва Ираклий Кобахидзе дар мулоқотҳои хосса ва васеъ масъалаҳои муҳими ҳамкории дуҷониба, аз ҷумла рушди муносибатҳои иқтисодӣ, тавсеаи робитаҳои нақлиётӣ ва логистикӣ, ҷалби сармоягузорӣ ва таҳкими ҳамкориҳои гуманитариро баррасӣ намоянд.

Аз рӯи натиҷаҳои мулоқотҳо имзои бастаи санадҳои нави ҳамкорӣ дар назар дошта шудааст, ки барои рушди минбаъдаи муносибатҳои Тоҷикистону Гурҷистон заминаи ҳуқуқии нав фароҳам меоранд.

Ба сафари мазкур аҳамияти махсусро мулоқоти дарпешистодаи Сарвазири Гурҷистон бо Президенти Ҷумҳурии Тоҷикистон муҳтарам Эмомалӣ Раҳмон мебахшад. Ба андешаи коршиносон, чунин тамосҳои сатҳи баланд имконият медиҳанд, ки вазъи кунунии муносибатҳо арзёбӣ гардида, самтҳои нави ҳамкорӣ мутобиқ ба воқеияти минтақа ва ҷаҳон муайян карда шаванд.

Гурҷистон барои Тоҷикистон яке аз шарикони муҳими минтақаи Қафқози Ҷанубӣ ба ҳисоб меравад. Дар навбати худ Тоҷикистон барои ҷониби гурҷӣ ҳамчун иштирокчии муҳими масирҳои нави нақлиётӣ ва тиҷоратӣ, ки Осиёи Марказиро бо Қафқоз, Баҳри Сиёҳ ва бозорҳои Аврупо мепайванданд, аҳамияти хос дорад.

Дар рӯзи дуюми сафар Ираклий Кобахидзе бо Раиси Маҷлиси намояндагони Маҷлиси Олии Ҷумҳурии Тоҷикистон мулоқот намуда, ҳамчунин аз Осорхонаи миллии Тоҷикистон ва намоишгоҳи маҳсулоти корхонаҳои саноатии мамлакат боздид хоҳад кард.

Яке аз рӯйдодҳои рамзии барномаи сафар иштирок дар маросими ифтитоҳи нимпайкараи шоир ва мутафаккири бузурги асрҳои миёнаи Гурҷистон Шота Руставелӣ хоҳад буд. Ин иқдом ҳамчун нишонаи таваҷҷуҳи тарафҳо ба рушди робитаҳои фарҳангӣ ва гуманитарӣ арзёбӣ мешавад, ки солҳои зиёд заминаи устувори муносибатҳои байнидавлатиро ташкил медиҳанд.

Нозирон бар ин назаранд, ки сафари расмии Сарвазири Гурҷистон дар шароити афзоиши таваҷҷуҳи кишварҳои Авруосиё ба рушди долонҳои нави нақлиётӣ ва тавсеаи робитаҳои иқтисодӣ сурат мегирад. Аз ин рӯ, музокироти Душанбе метавонад барои густариши шарикии Тоҷикистону Гурҷистон дар бахшҳои савдо, сармоягузорӣ, сайёҳӣ ва фарҳанг такони нав бахшад.

Манбаи акс: АМИТ «Ховар»