Душанбе, 21 июл, – АИ «Корвон Иттилоот». Тоҷикистон мавқеи худро ҳамчун яке аз марказҳои муҳими ҳамкориҳои иқтисодии минтақавӣ боз ҳам таҳким мебахшад. 22–23 сентябри соли 2026 шаҳри Душанбе мизбони Ҷаласаи чоруми вазирони саноати давлатҳои узви Созмони ҳамкории иқтисодӣ (СҲИ) мегардад, ки дар он роҳбарони мақомоти соҳавии кишварҳои узв масъалаҳои рушди ҳамкориҳои саноатӣ ва татбиқи лоиҳаҳои муштараки истеҳсолиро баррасӣ хоҳанд кард.

Дар ин бора зимни нишасти хабарӣ вазири саноат ва технологияҳои нави Ҷумҳурии Тоҷикистон Шералӣ Кабир иттилоъ дод.

Ба гуфтаи вазир, даъватномаҳои расмӣ барои иштирок дар чорабинии сатҳи баланд ба ҳамаи давлатҳои узви Созмони ҳамкории иқтисодӣ ва инчунин кишварҳои шарик ирсол гардидаанд.

Ғайр аз ҷаласаи вазирон, барномаи форум баргузории нишасти гурӯҳи коршиносони сатҳи баланд-ро низ дар бар мегирад, ки дар он тақрибан 50 нафар коршинос ва мутахассиси байналмилалӣ иштирок хоҳанд кард. Дар доираи ин нишаст масъалаҳои густариши ҳамкориҳои саноатӣ, навсозии технологӣ, рушди занҷираҳои истеҳсолӣ ва ҷалби сармоягузорӣ мавриди муҳокима қарор хоҳанд гирифт.

Интизор меравад, ки форум ба майдони муҳими мубодилаи таҷриба, баррасии тамоюлҳои нави рушди саноат ва таҳияи роҳкорҳои муштарак барои рушди устувори бахши саноати кишварҳои узви СҲИ табдил ёбад.

Баргузории Ҷаласаи чоруми вазирони саноати СҲИ дар Душанбе аз болоравии нақши Тоҷикистон дар ташаккули рӯзномаи саноатии минтақа шаҳодат медиҳад. Солҳои охир ҷумҳурӣ ҳамчун майдони баргузории ҳамоишҳои муҳими байналмилалӣ ва гуфтушунидҳои иқтисодӣ фаъолона мавқеи худро таҳким бахшидааст.

Аҳамияти вижаи ин форум дар он аст, ки он дар шароити татбиқи сиёсати нави индустриалии кишвар баргузор мешавад. Дар чунин шароит, форуми СҲИ метавонад ба ҷалби сармоягузории нав, густариши ҳамкориҳои истеҳсолӣ, ташкили занҷираҳои фаромарзии истеҳсолӣ ва татбиқи лоиҳаҳои муштарак дар бахшҳои технологияҳои баланд, саноати коркард ва иқтисоди «сабз» мусоидат намояд. Барои Душанбе бошад, ин имконияти навбатӣ барои таҳкими мақоми худ ҳамчун яке аз марказҳои асосии дипломатияи иқтисодии Осиёи Марказӣ ва Ҷанубӣ мебошад.

Акс: Вазорати саноат ва технологияҳои нави Ҷумҳурии Тоҷикистон / АМИТ «Ховар»