Душанбе, 26 август, – АИ «Корвон Иттилоот». Дар бинои КВД «Маркази рақамикунонӣ, инноватсия ва такмили ихтисоси кадрҳои соҳаи кишоварзӣ»-и Вазорати кишоварзии Ҷумҳурии Тоҷикистон ҷаласаи гурӯҳи кории техникӣ баргузор гардид.

Чорабинӣ дар доираи лоиҳаи «Ҷалб намудани ҷавонони хоҷагиҳои фермерии хурд тавассути истифода намудани технологияҳои кишоварзӣ барои беҳтар намудани амнияти озуқаворӣ ва занҷирҳои арзиши маҳсулот» доир шуд.

Дар он намояндагони Вазорати кишоварзӣ, сохторҳои дахлдор, Академияи илмҳои кишоварзӣ, Донишгоҳи аграрии Тоҷикистон ба номи Ш. Шоҳтемур, инчунин созмонҳои байналмилалӣ (WFP, KOICA, Caritas, WHH, GNT) ва бахши хусусӣ иштирок намуданд.

Фаъолият дар доираи «Барномаи рақамикунонии соҳаи кишоварзии Ҷумҳурии Тоҷикистон барои солҳои 2025–2029» (қарори Ҳукумати ҶТ аз 29 майи соли 2025, № 334) амалӣ мегардад. Иштирокчиён механизмҳои супоридан, тарзи фаъолият ва равиши ягона барои устувории киоскҳои рақамии кишоварзӣ дар ноҳияҳои ҳадафро муфассал баррасӣ карданд.

 Ҷараёни омодагӣ ба Конференсияи миллӣ ва намоишгоҳи технологияҳои рақамӣ дар соҳаи кишоварзӣ «Digital AgriExpo Tajikistan-2026», ки моҳи декабри соли 2026 пешбинӣ шудааст, мувофиқа гардид. Роҳбарони лоиҳа нақшаи тренингҳои сайёри минтақавӣ, натиҷаҳои бадастомада ва нақшаҳои рушди платформаҳои онлайн барои деҳқононро пешниҳод намуданд.

Аз нуқтаи назари таҳлилӣ ҷорӣ намудани хизматрасониҳои рақамӣ ва киоскҳои кишоварзӣ дар деҳот монеаҳои иттилоотиро барои деҳқонони хурд коҳиш медиҳад, ҷавононро ба агробизнес ҷалб мекунад ва занҷирҳои озуқавории кишварро оптимизатсия менамояд.

Чунин ташаббусҳо ба баланд бардоштани самаранокии кишоварзӣ, таҳкими амнияти озуқаворӣ ва ташаккули инфрасохтори муосири рақамӣ дар минтақаҳо мусоидат мекунанд.

Акс: Маркази рақамикунонӣ, инноватсия ва такмили ихтисоси кадрҳои соҳаи кишоварзӣ