Душанбе, 01 сентябр, – АИ «Корвон Иттилоот». Дар остонаи Иди суннатии дониш ва ДАРСИ СУЛҲ пойтахти Тоҷикистон дар татбиқи стратегияи давлатии навсозии инфрасохтори иҷтимоӣ қадами дигари бузург гузошт.
Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамроҳ бо Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ 31 август дар маросими тантанавии ба истифода додани бинои нави муассисаи таҳсилоти миёнаи умумии № 105 дар ноҳияи Шоҳмансур иштирок намуданд.
Муассисаи нави таълимӣ маҷмааи бисёрфунксионалӣ аз 5 қисм иборат буда, барои 2400 хонанда дар ду баст пешбинӣ шудааст. Объект аз ҷониби Мақомоти иҷроияи ҳокимияти давлатии шаҳри Душанбе бунёд гардида, барои пурра таъмин намудани эҳтиёҷоти насли навраси 3 маҳаллаи ноҳияи Шоҳмансур ба таҳсилоти хушсифати мактабӣ нигаронида шудааст.
Пуррагии инфрасохтории муассиса ба ҳама стандартҳои кластерҳои муосири таҳсилот ҷавобгӯ мебошад:
Инфрасохтори истифодаи умум: Толори маҷлисгоҳ барои 400 ҷойи нишаст, ошхона барои 290 ҷой, толори махсуси варзишӣ, инчунин китобхонаҳои анъанавӣ ва электронӣ.
Фонди таълимӣ: Маҷмаа дорои 130 синфхона ва кабинети кории ёрдамчӣ мебошад. Аз онҳо 10 синфхона ва лабораторияи соҳавӣ барои омӯзиши амиқи физика, химия, биология, информатика, забонҳои хориҷӣ, мусиқӣ, омодагии ҳарбӣ ва таълими меҳнатӣ муҷаҳҳаз гардонида шудаанд.
Ҳудуди атроф: Майдончаи пурраи варзишӣ ва майдони омодагии ҳарбӣ бунёд ёфта, ҳавлии муассиса роҳандозӣ, сабзкорӣ ва бо тизими муосири рӯшноидиҳӣ таъмин карда шудааст.
Дар лоиҳакашии мактаби № 105 ба ҳамгироии амалии лоиҳаи миллӣ — «Бистусолагии омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» диққати махсус дода шудааст. Таҷҳизонидани лабораторияҳои табиатшиносӣ имкон медиҳад, ки омӯзиши фанҳои дақиқ дар сатҳи лабораториву таҳқиқотӣ ба роҳ монда шавад.
Ҳамзамон дар мактаб синфхонаҳои махсуси тарбияи меҳнатӣ барои писарон ва духтарон ташкил карда шудаанд. Интихоби пешакии касб ва гирифтани малакаҳои ибтидоии амалии меҳнати босифат аз ҷониби мақомоти шаҳрдорӣ ҳамчун воситаи самарабахши шаклгирии рақобатпазирии баланди хатмкунадагони оянда дар бозори меҳнат баррасӣ мегардад.
Ба истифода додани пайвастаи объектҳои бузурги таҳсилотӣ дар Душанбе тамоюли устуворро ба табдилдиҳии шабакаи мактабҳои пойтахт нишон медиҳад. Сохтмони мактабҳои нав на танҳо масъалаи демографии шаҳри афзояндаро ҳал мекунад, балки боргирии муассисаҳои таълимии мавҷударо кам карда, гузаришро аз нишондиҳандаҳои миқдорӣ ба стандарти хушсифати таҳсилот таъмин менамояд.
Сарвари давлат муҳтарам Эмомалӣ Раҳмон пас аз шиносоӣ бо шароити муҳайёшуда ба ташаббусҳои шаҳрдории пойтахт оид ба бунёди корпусҳои таълимӣ ва таълими наврасон дар шароити муосир баҳои баланд дода, онҳоро барои тарбияи насли соҳибмаърифат, худкошо ва мутахассисони баландихтисос муҳим арзёбӣ намуданд.
Ба истифода додани объекти № 105 як қисми Нақшаи чорабиниҳо ба хотири ҷашнгрифтани 35-солагии Истиқлолияти давлатии Ҷумҳурии Тоҷикистон гардид.
Кушодашавии муассисаи таҳсилоти миёнаи умумии № 105 дар Рӯзи дониш ва дасти сулҳ барои сокинони ноҳияи Шоҳмансур армуғони арзишманди амалӣ ва маънавӣ гардида, дар таҳкими иқтидори таълимии пойтахт қадами дигари муҳим маҳсуб меёбад.
Манбаи акс: Хизматрасонии матбуоти Президенти Ҷумҳурии Тоҷикистон