ДУШАНБЕ, 14 сентябри соли 2026 – АИ «Караван Инфо». Намояндагони Барномаи озуқавории ҷаҳонии СММ (БОҶ) ва Агентии захираҳои моддии давлатии назди Ҳукумати Ҷумҳурии Тоҷикистон аз Корхонаи фаръии «Ордбарорӣ»-и ноҳияи Шуғнон боздид намуда, бо раванди ғанисозии орд шинос шуданд. Ҷонибҳо натиҷаҳои бадастомадаро мавриди таҳлилу баррасӣ қарор дода, аз дастоварҳои ҳамкории муштарак истиқбол намуданд.
Аз соли 2025 инҷониб Барномаи озуқавории ҷаҳонии СММ (БОҶ) насби таҷҳизоти муосири ғанисозии ордро дар корхонаҳои ордбарории давлатӣ дастгирӣ намуда, дар соли 2026 барои таҳкими назорати сифат ва иқтидори истеҳсолӣ таҷҳизоти озмоишгоҳӣ, реагентҳо ва маводи премикс таъмин кард. Ин сармоягузориҳо имкон доданд, ки Корхонаи фаръии «Ордбарорӣ»-и ноҳияи Шуғнон моҳи июли соли 2026 истеҳсоли расмии орди ғанигардонидашударо оғоз намояд.
Натиҷаҳо аллакай назаррасанд. Корхона тақрибан 800 тонна орди ғанигардонидашуда истеҳсол кардааст, ки тавассути мағозаҳо ва бозорҳои тамоми ВМКБ, аз ҷумла дар ноҳияҳои дурдасти Рӯшон, Мурғоб, Ишкошим ва водии Бартанг расонида мешавад.
Бо 2,5 тонна премиксе, ки аз ҷониби БОҶ бо дастгирии саховатмандонаи dsm-firmenich таъмин гардид, корхонаҳои истеҳсоли орд метавонанд тақрибан 12 000 тонна орди гандумро ғанӣ гардонанд. Ин ба беҳтар шудани дастрасии аҳолӣ ба витаминҳо ва минералҳои муҳим дар ВМКБ, Хатлон ва Суғд мусоидат мекунад.
Орди ғанигардонидашуда ва маҳсулоти нонӣ, ки дар корхона истеҳсол мешаванд, ба хонаводаҳо, муассисаҳои таълимӣ ва кӯдакистонҳо дастрас мегардад. Он ба пешгирии камхунӣ, норасоии йод ва қадпастии кӯдакон, махсусан дар минтақаҳои кӯҳистонии дастнорас, замина мегузорад. Бо беҳтар намудани арзиши ғизоии яке аз маҳсулоти асосии рӯзмара, ин ташаббус ба бунёди ҷомеаҳои солимтар ва ояндаи дурахшони кӯдакону занон мусоидат мекунад.
Ин дастовард аз ҳамкории самараноки БОҶ, dsm-firmenich, муассисаҳои давлатӣ ва корхонаҳои истеҳсоли орд гувоҳӣ медиҳад. Якҷо мо татбиқи Қонуни Ҷумҳурии Тоҷикистон «Дар бораи ғанисозии маҳсулоти хӯрокворӣ»-ро дастгирӣ намуда, ба таҳкими амнияти озуқаворӣ ва беҳтар намудани ғизои аҳолӣ дар саросари мамлакат саҳм мегузорем.
Акс: Барномаи озуқавории ҷаҳонии СММ / Агентии захираҳои моддии давлатии назди Ҳукумати Ҷумҳурии Тоҷикистон