Душанбе, 15 сентябр, – АИ «Корвон Иттилоот».Дар ҳудуди машқгоҳи низомии «Коктал»-и Қазоқистон марҳилаи фаъоли машқҳои муштараки низомӣ бо иштироки Нерӯҳои дастаҷамъии вокуниши сареъи минтақаи Осиёи Марказӣ (НДВСОМ) дар доираи Созмони Аҳдномаи амнияти дастаҷамъӣ (СААД) таҳти унвони «Рубеж-2026» оғоз гардид. Дар ин машқҳо низомиёни Тоҷикистон иштирок доранд.

Машқҳои муштарак аз 13 то 18 сентябр таҳти роҳбарии фармондеҳи Қӯшунҳои десантӣ-ҳамлагари Қувваҳои Мусаллаҳи Ҷумҳурии Қазоқистон, полковник Махсут Гусейнов, баргузор мешаванд. Сенарияи машқҳо бо чорабинии асосии омодагии оперативӣ ва ҷангии Қувваҳои Мусаллаҳи Қазоқистон — машқҳои стратегии фармондеҳӣ-ситодии «Ответный отпор-2026» ҳамоҳанг карда шудааст.

Дар ҷараёни «Рубеж-2026» ба иҷрои вазифаҳои таълимию ҷангӣ дар шароити минтақаи кӯҳию биёбонӣ, инчунин ба ҳамкории НДВСОМ бо воҳидҳои Қӯшунҳои сарҳадӣ ва Гвардияи миллии Қазоқистон таваҷҷуҳи махсус зоҳир мешавад.

Дар машқҳои муштарак воҳидҳои низомии Қазоқистон, Қирғизистон, Русия ва Тоҷикистон, инчунин гурӯҳҳои оперативии Ситоди муттаҳид ва Котиботи СААД иштирок доранд.

Ҳадафи асосии машқҳо такмили амалҳои амалии нерӯҳои дастаҷамъӣ дар шароити ба миён омадани таҳдид ба амнияти давлати узви СААД мебошад. Низомиён малакаҳои омодагӣ ва анҷом додани амалиёти ҷангӣ барои бартарафсозии гурӯҳҳои мусаллаҳи ғайриқонунӣ, ки ба қаламрави давлати иштирокчии созмон ворид шудаанд, такмил медиҳанд.

Машқҳо ҳамзамон сатҳи ҳамоҳангии воҳидҳои низомӣ ва омодагии онҳоро ба иҷрои муштараки вазифаҳо месанҷанд. Барои кишварҳои Осиёи Марказӣ ин гуна тамринҳо аҳамияти амалӣ дошта, имкон медиҳанд, ки ҳамкории нерӯҳои вокуниши сареъ, сохторҳои марзбонӣ ва дигар воҳидҳои дахлдор дар шароити мураккаби кӯҳию биёбонӣ такмил дода шуда, механизмҳои вокуниш ба ҳолатҳои буҳронӣ санҷида шаванд.

Иштироки Тоҷикистон дар «Рубеж-2026» аз ҳамкории амалии кишвар бо давлатҳои минтақа дар доираи механизмҳои амнияти дастаҷамъии СААД шаҳодат медиҳад.

Манбаи акс: Хадамоти матбуоти СААД